Лінкі ўнівэрсальнага доступу

«За апазыцыйных вылучэнцаў падпісваюцца бяз веры ў іх перамогу», — рэкардсмэны кампаніі па зборы подпісаў


Ніводзін з канкурэнтаў Аляксандра Лукашэнкі пакуль не сабраў патрэбных ста тысяч подпісаў у сваю падтрымку. Актывісты іх ініцыятыўных груп заяўляюць, што ім даводзіцца адольваць пасіўнасьць людзей, якія ня вераць, што гэтымі выбарамі нешта ў краіне можна зьмяняць. Ёсьць у ініцыятыўных групах тыя каму найлепш удаецца праца з выбарцамі.

Крычаўская пэнсіянэрка Надзея Іванова зьбірае подпісы ў падтрымку Тацяны Караткевіч ды Анатоля Лябедзькі. За апазыцыйных вылучэнцаў яна падпісала больш за 380 жыхароў.

КРЫЧАЎ

Пікетаў, паводле жанчыны, у райцэнтры няма. Кабета сьцьвярджае, што адна ў Крычаве наважылася ходзіць па кватэрах ды падпісваць жыхароў за канкурэнтаў Аляксандра Лукашэнкі. Надзея Іванаўна кажа:

«Нярэдка людзі пытаюць, ці не баюся гэтак адкрыта падтрымліваць апазыцыянэраў. Не, адказваю. У мяне дакумэнты ў парадку. Нічога супраць закону не раблю.

Ня больш за 20 працэнтаў пэнсыянэраў ставяць свае подпісы ў падтрымку апазыцыйных вылучэнцаў. Падпісваецца ж за іх пераважна моладзь.

Некаторыя, звоніш у дзьверы, выходзяць і кажуць: „Калі вы зьбіраеце подпісы за Лукашэнку да нас не заходзьце. Калі не за яго, то калі ласка“. Такія кажуць часта: „Надакучыла ўжо. Час яго мяняць. 21 год пры ўладзе, колькі ж можна. Патрэбны нехта памаладзей“. У Крычаве працы можна сказаць няма і заробкаў таксама. Як у нас, тут, жыць людзям? Адсюль і такія настроі», — робіць выснову суразмоўніца.

МАГІЛЁЎ

Паводле актывісткі, канфліктаў за ўвесь час збору подпісаў у яе зь людзьмі не было. Тыя хто падтрымаў Аляксандра Лукашэнку, больш за нікога не падпісваюцца.

Больш за трыста подпісаў сабраў за тых жа вылучэнцаў беспрацоўны будаўнік і прафсаюзны актывіст з Магілёва Аляксей Паўлоўскі. Ён абраў сабе для выбарчай працы адзін з тутэйшых спальных мікрараёнаў.

Прызнаецца: падпісаў ня шмат людзей, бо многія ў адпачынках, альбо ратуюцца ад сьпёкі на лецішчах. Як і Надзея Іванова Паўлоўскі даводзіць, што нямала жыхароў мікрараёну заяўлялі яму празь дзьверы:

Аляксей Паўлоўскі

Аляксей Паўлоўскі

«Калі ён падпісвае за Лукашэнку, то няхай ідзе прэч.

Некалькі дзясяткаў чалавек, заяўляе актывіст, яму паскардзіліся, што іх змусілі падпісацца за Аляксандра Лукашэнку. Загадалі на працу прыйсьці з пашпартамі».

Паўлоўскі цьвердзіць, што зьбірае подпісы, каб дапамагчы апазыцыйным вылучэнцам. Ніякіх матэрыяльных выгод ад свае працы ня мае:

«Хіба на гэтым разбагацееш. Калі б да яго зьвярнуліся іншыя канкурэнты Лукашэнкі, то дапамог бы і ім».

«Трэба нешта мяняць у краіне, — тлумачыць Паўлоўскі. — Я акрамя таго, што зьбіраю подпісы за Лябедзьку і Караткевіч падпісваю людзей пад зваротам супраць Закону аб дармаедах. Пад ім шмат людзей падпісалася. Людзі кажуць: гэты закон зьдзек. Пазбавілі працы ды яшчэ прыдумалі падатак за беспрацоўе».

У Бабруйску за Караткевіч і Лябедзьку нямала актывістаў з іхных ініцыятыўных груп здолелі сабраць больш за дзьвесьце подпісаў. Аляксандар Дзяткоў мае 340. Падпісвае бабруйцаў ходзячы па кватэрах. Кажа: кожныя чацьвёртыя дзьверы яму адчыняюць. У палове з іх падпісваюцца.

«Сьведчыць гэта пра тое, што адэкватных, думаючых людзей значная колькасьць. Многія перад тым, як падпісацца спачатку разважаюць. Нямала людзей, аднак, калі я ім кажу пра палітыкаў, за якіх зьбіраю подпісы, адказваюць: „А хто гэта такія? Я іх ня ведаю і падпісвацца ня буду“. Многія ўсё ж падпісваюцца, нягледзячы на тое, што таксама ня ведаюць гэтых палітыкаў, альбо чулі некалі і я ім пра іх нагадаў», --- зазначае Аляксандар Дзяткоў.

Актывіст Аб’яднанай грамадзянскай партыі з Магілёва Эдуард Абакановіч са сваімі 150 подпісамі за Анатоля Лябедзьку ня лічыць сябе рэкардсмэнам. Прызнаецца: збор подпісаў праходзіць млява.

«Патрэбная нейкая рэсурсная падтрымка, бо актывістамі шмат подпісаў не зьбярэш. Гэта трэба прызнаць, бо гэта мае значэньне. Мы ж валянтэры», —зазначае партыец.

«Я б не сказаў, што падпісваюцца менш, чым у мінулую прэзыдэнцкую кампанію. Цяпер, аднак, у людзей больш пэсымізму. Усе ж ведаюць хто ўжо перамог. Тое, што выбараў няма — гэта разумее бальшыня людзей. Многія не хаваюць, што іх ўсё даняло ў краіне.

«Я вызначаю прыхільнасьць чалавека па твары, — працягвае аповед актывіст. — Калі ён трымаецца дэмакратычных поглядаў, то ўсьміхаецца і адкрыты да гутаркі. Прыхільнікі ж Рыгоравіча — часьцей змрочныя, больш агрэсіўныя».

Кіраўнік абласной арганізацыі Аб’яднанай Грамадзянскай партыі Ўладзімер Шанцаў кажа: на пікетах сабраў каля паўтысячы подпісаў. Партыец амаль штодня выходзіць да людзей і даводзіць ім, што вылучэнец, якога ён прадстаўляе, варты быць прэзыдэнтам.

Уладзімер Шанцаў

Уладзімер Шанцаў

«Калі казаць пра актыўнасьць, то як мне падаецца, — заўважае ён, — больш людзей падпісваліся за Лябедзьку, чым за Лукашэнку. Пікет у яго падтрымку быў непадалёк ад нашага. Мы іншым разам назіралі за іхным пікетам ды падлічвалі тых хто там падпісваўся, дык, у нас падпісчыкаў атрымлівалася было прыкладна ў паўтары разы болей».

Уладзімер Шанцаў кажа, што партыйныя актывісты ў Магілёве сабралі больш за дзьве тысячы подпісаў. Кіраўнік партыйнай арганізацыі прызнаецца: «Гэта да сораму дужа мала».

Што да ўмоваў, у якіх праходзіць кампанія збору подпісаў, то партыец адзначае:

«Цяпер нібыта ўсё дазваляюць. Такі разгул дэмакратыі. Разам з намі стаяць людзі са сьцягам БХД, бел-чырвона-белым сьцягам і такое ўражаньне, што ўсё адпусьцілі, ўсё дазволілі».

Паказаць камэнтары

XS
SM
MD
LG