Як паведаміла ў сераду прэсавая служба Крамля, пытаньне было ўрэгуляванае ў ходзе тэлефоннай размовы ў сераду паміж Уладзімерам Пуціным і Франсуа Аляндам.
У паведамленьні гаворыцца, што Францыя ўжо пералічыла Расеі сродкі, выплачаныя па кантракце. У адміністрацыі прэзыдэнта Францыі пацьвердзілі гэтую інфармацыю.
У Элісейскім палацы заявілі, што, паводле дамоўленасьцяў, Францыя «выключна і цалкам» пакрывае Расеі суму авансу за караблі. З паведамленьня вынікае, што французскі бок ня будзе ажыцьцяўляць штрафныя выплаты за зрыў кантракту.
Варта адзначыць: да гэтага часу расейскія крыніцы сьцьвярджалі, што сума, якую верне Францыя, будзе значна больш, чым выплачаны расейскім бокам авансавы плацёж у памеры 800 млн эўра. У прыватнасьці, гучала прагнозная сума ў 1,2 млрд эўра.
Акрамя таго, Элісейскі палац заявіў, што ўсталяванае на «Містраль» абсталяваньне пасьля разрыву кантракту будзе дэмантавана і перададзенае Расеі: «Расейскае абсталяваньне, усталяванае на судах, будзе вернута». Дэмантаж абсталяваньня павінен пачацца ў верасьні.
Элісейскі палац асобна адзначыў, што Францыя атрымала права свабодна распараджацца караблямі, гэта значыць ніякіх абмежаваньняў на іх продаж не ўстаноўлена. Раней Парыж праводзіў перамовы з Кітаем аб продажы «Містраляў», першапачаткова прызначаных для РФ, піша ўкраінскі сайт «Європейська правда».
Кантракт коштам 1 мільярд 300 мільёнаў даляраў быў падпісаны ў 2011 годзе. Плянавалася, што першы карабель паступіць на ўзбраеньне расейскага флёту ў 2014 годзе, аднак Парыж прыпыніў яго выкананьне ў рамках санкцый ЭЗ у дачыненьні да Масквы, якія сталіся адказам на анэксію Расеяй Крыма і яе ўдзел у вайне і дэстабілізацыі сытуацыі на ўсходзе Ўкраіны.
