Лінкі ўнівэрсальнага доступу

У ЗША дазволілі пігулку, вырабленую 3D-друкаркай


Упраўленьне па кантролі якасьці харчовых прадуктаў і лекавых прэпаратаў ЗША (FDA) ўпершыню ў гісторыі ухваліў пігулку, створаную з дапамогай 3D-друкаркі. Пра гэта паведамляе BBC.

Раней FDA ўжо ўхваліла вытворчасьць з выкарыстаньнем 3D-друкарак розных прыладаў і апаратаў, якія ўжываюцца ў мэдыцыне, у прыватнасьці пратэзаў.

Новы прэпарат Spritam, створаны з дапамогай трохмернага друку, дапамагае кантраляваць эпілептычныя курчы.

Кампанія Aprecia Pharmaceuticals, якая стварыла пігулка, абяцае распрацаваць пры дапамозе сучасных тэхналёгіяў і іншыя лекавыя прэпараты.

3D-таблетка распускаецца ў арганізьме чалавека, гэтак жа як і іншыя лекі.

Друк пігулак дазваляе падвысіць дакладнасьць дазаваньня і ствараць індывідуальныя лекавыя прэпараты з утрыманьнем актыўнага рэчыва да 1000 міліграмаў.

Новая тэхналёгія дазволіць у будучыні ствараць пэрсаніфікаваныя лекі «на замову» у залежнасьці ад канкрэтных патрэбаў пацыента, замест адзінай дазіроўкі для ўсіх, упэўненыя экспэрты.

«Апошнія 50 гадоў мы штампавалі пігулкі на фабрыках і затым развозілі іх па шпіталях. Упершыню ў гісторыі мы можам ствараць лекі, не адыходзячы ад пацыентаў», — кажа аўтар лекцый па фармацэўтыцы Ўнівэрсытэту Цэнтральнага Ланкашыру Махамад Альбед Альнан.

Дазаваньне лекаў можа мяняцца ў залежнасьці ад патрэбаў пацыента простай маніпуляцыяй з друкаркай. У мінулым, паводле Альнана, падобныя лекі «пад ключ» былі вельмі дарагія ў вытворчасьці.

У аснове 3D-друку ляжыць прынцып папластовага стварэньня аб’екту.

Пры стварэньні пігулкі 3D-прынтэр выкарыстоўвае ў якасьці «чарнілаў» лекавыя рэчывы, якія пласт за пластом фармуюць пігулку.

У мэдыцыне трохмерным друкам ужо карыстаюцца пры стварэньні розных прыладаў, у прыватнасьці, імплянтатаў для пацыентаў з рознымі траўмамі.

Стаматолягі раней таксама ўжо ўжывалі новыя тэхналёгіі для друку на 3D-прынтары сківіц і зубных імплянтантаў.

XS
SM
MD
LG