Лінкі ўнівэрсальнага доступу

Юшчанка: «Дэпардзьё выказваўся наконт Пуціна так, што вы б «запікалі» гэта ў эфіры»


Жэрар Дэпардзьё прынёс прыніжэньне сваёй нацыі, ягоныя ранейшыя заявы пра Пуціна давялося б «запікваць» у эфіры, сказаў у інтэрвію Радыё Свабода трэці прэзыдэнт Украіны Віктар Юшчанка, які неаднаразова прымаў францускага актора ў сваім доме.

Ганна Соўсь: У час, калі мы з вамі праводзім інтэрвію, зьявіліся інфармацыя, што Жэрару Дэпардзьё забаранілі на пяць гадоў уезд ва Ўкраіну за антыўкраінскія выказваньні. Некалі актор прыяжджаў ва Ўкраіну, сустракаўся з вамі, гаварылася нават, што вы сябры. Вышыванку ён адзяваў. Усё ў парадку было. Я цяпер вы ацэньваеце антыўкраінскія заявы Дэпардзьё? Як гэта ўсё стасуецца з тым, што было раней?


Віктар Юшчанка: Мне балюча гаварыць, шчыра скажу. Я ня тое што не разумею, што робіць Жэрар апошнія некалькі гадоў. Я быў глыбока перакананы, што ў тых адносінах, якія былі ў мяне зь ім, у маёй сям’і, гэты чалавек правільна клясыфікаваў, хто такі Пуцін. Прычым ён гэта гаварыў дзясяткі разоў. З этычных меркаваньняў я не буду называць ягоныя словы, таму што вы «запікаеце» ў эфіры. Я лічыў, што гэта былі ягоныя перакананьні. І я сёньня не магу ўявіць сілу іншых матываў, якія прымусілі чалавека ў гадах так памыляцца. Я думаю, што ён прынёс прыніжэньне сваёй нацыі тым, што ён зрабіў апошнія два гады ў сваёй прарасейскай ідэнтыфікацыі.


Францзскі актор Жэрар Дэпардзьё неаднаразова наведваў Украіну ў часы прэыздэнцтва Віктара Юшчанкі. У 2007 годзе разам зь сям’ёй Юшчанкаў сустракаў Каляды. Прэса пісала пра сяброўства францускага актора і трэцяга прэзыдэнта Ўкраіны. Дэпардзьё выказваў інтарэс да ўкраінскіх вінаграднікаў у Крыме і Закарпацьці.

Днямі францускаму актору Жэрару Дэпардзье, які атрымаў грамадзянства Расеі і вядомы сваімі антыўкраінскай заявамі, на 5 гадоў забаронены ўезд ва Ўкраіну. «Служба бясьпекі Ўкраіны прыняла рашэньне аб забароне яму ўезду на пяць гадоў на падставе звароту Міністэрства культуры Ўкраіны», — паведаміла прэс-сакратар СБУ Алена Гітлянская. 22 ліпеня грамадзкія актывісты перадалі ў Міністэрства культуры сьпіс 567 дзеячаў культуры з замежжа з патрабаваньнем забараніць прысутнасьць гэтых асобаў у тэлерадыёпрасторы Ўкраіны за іх публічныя антыўкраінскія заявы.

Днямі, пабываўшы ў Беларусі, Дэпардзьё заявіў, што не разумее, чаму ў прэзыдэнта Беларусі Аляксандра Лукашэнкі дрэнная рэпутацыя на Захадзе, а таксама падтрымаў увядзеньне ў Беларусі падатку з дармаедаў.

  • 16x9 Image

    Ганна Соўсь

    Ганна Соўсь нарадзілася ў Менску. Скончыла факультэт журналістыкі БДУ. Працавала ў незалежнай газэце «Народная воля»(1997-2000). Ад 2000 году працуе на «Свабодзе». Кнігі на «Свабодзе» — «Дарога праз Курапаты» (аўтарка рэпартажаў), «Адзін дзень палітвязьня» (ідэя і ўкладальніца), «Адзін дзень палітвязьня. 2009-2011»(ідэя і ўкладальніца), «Жыцьцё пасьля раку» (аўтарка ідэі і каардынатарка праекту, рэдактарка). Аўтарка праекту «Расея і я», сэрыі інтэрвію з 12 экс-прэзыдэнтамі постсавецкіх кранаў. Сябра БАЖ.

Паказаць камэнтары

XS
SM
MD
LG