Лінкі ўнівэрсальнага доступу

Ігар Леднік: удзел апазыцыі ў выбарах — гэта саўдзел у злачынстве


Ігар Леднік

Ігар Леднік

Грамадзкі актывіст і прадпрымальнік Ігар Леднік заклікае апазыцыю замест удзелу ў прэзыдэнцкіх выбарах правесьці кампанію па адхіленьні Аляксандра Лукашэнкі ад улады.

Ігар Леднік зьвярнуўся ў Цэнтравыбаркам з просьбай адмяніць рэгістрацыю ініцыятыўнай групы Аляксандра Лукашэнкі. З пункту гледжаньня актывіста, прававая падстава для гэтага — заключэньне Спэцыяльнай камісіі Вярхоўнага Савету 13-га скліканьня па прававой ацэнцы парушэньняў Аляксандрам Лукашэнкам Канстытуцыі і законаў Рэспублікі Беларусь. Правядзеньне 24 лістапада 1996 году рэфэрэндуму па зьмене Канстытуцыі камісіяй пад кіраўніцтвам Віктара Ганчара было ацэнена як крымінальнае злачынства — захоп дзяржаўнай улады неканстытуцыйным шляхам.

«Ёсьць заключэньне спэцкамісіі Вярхоўнага Савету 13-га скліканьня. У гэтым заключэньні выразна сказана, што ў 1996 годзе адбыўся канстытуцыйны пераварот. Гэтае заключэньне павінна было быць публічна агучана 19 верасьня 1999 году, але 16-га верасьня Ганчар зьнікае. Гэтае заключэньне цяпер, па сутнасьці, не запатрабаванае нашай апазыцыяй», — заявіў Леднік Радыё Свабода.

Гэта ўжо ня першы зварот у дзяржаўныя органы наконт адхіленьня Лукашэнкі ад улады. У 2010 годзе, падчас прэзыдэнцкай кампаніі, праваабаронца Гары Паганяйла зьвярнуўся ў Палату прадстаўнікоў і Савет міністраў з заклікам распачаць працэдуру адхіленьня Лукашэнкі ад улады, якая прадугледжана ч. 2 арт. 88 Канстытуцыі (аб датэрміновым вызваленьні прэзыдэнта ад пасады), выставіць яму абвінавачаньне паводле артыкула 357 Крымінальнага кодэксу («Змова ці іншыя дзеяньні, учыненыя з мэтай захопу дзяржаўнай улады») і арганізаваць расьсьледаваньне.

Паводле слоў Ледніка, сёньня сытуацыя зь легітымнасьцю Аляксандра Лукашэнкі абвастраецца складанай міжнароднай абстаноўкай — вайной ва Ўкраіне. Таксама гэта перашкаджае крокам у кірунку эўраінтэграцыі Беларусі, у прыватнасьці, у межах «Усходняга партнэрства».

У адказе ЦВК адзначаецца, што ў звароце Ігара Ледніка «не прыводзіцца зьвестак, якія маглі б паслужыць падставай для адмовы ў рэгістрацыі ініцыятыўнай групы па вылучэньні А.Г. Лукашэнкі кандыдатам у прэзыдэнты Рэспублікі Беларусь».

Далей Ігар Леднік зьбіраецца зьвяртацца ў пракуратуру і весьці кампанію па зваротах грамадзян да дэпутатаў Палаты прадстаўнікоў.

«Потым можна будзе ўздымаць пытаньне аб адказнасьці гэтых дэпутатаў, якія, па сутнасьці, працуюць не на народаўладзьдзе, а на пажыцьцёвае і незаконнае ўтрыманьне ўлады адзіным чалавекам. Гэта адказнасьць паводле крымінальнага кодэксу. Гэта ўжо зусім іншая кампанія, чым выбары», — кажа актывіст.

Леднік цалкам адмоўна ставіцца да ўдзелу апазыцыі ў прэзыдэнцкіх выбарах:

«Я лічу, што гэта саўдзел у злачынстве. Бо гэта ня выбары, гэта чарговы этап незаконнага „пераабраньня“. Лідэры гэтых палітычных сілаў ведаюць, што ёсьць такое заключэньне, але яны не карыстаюцца ім. А цяпер яны паказваюць усім выбарцам, што нібыта Лукашэнка законапаслухмяны грамадзянін, ён мае права ўдзельнічаць у выбарах. А гэта ня так. Яны, па сутнасьці, парушаюць выбарчыя правы грамадзян тым, што сваім удзелам паказваюць, што і сам Лукашэнка можа ўдзельнічаць у выбарах».

Паводле слоў Ледніка, дэпутаты Вярхоўнага Савету 13-га скліканьня, калі яны стаяць на пазыцыях вяршэнства права, павінны прытрымлівацца заключэньня спэцкамісіі. Самі дэпутаты 13-га скліканьня — аснова пераемнасьці ўлады, упэўнены Леднік. Ён лічыць, што каардынаваць працэс зьмены ўлады павінна Рада БНР на падставе Віленскай дэклярацыі 2012 году «Аб мерах па забесьпячэньні незалежнасьці Беларусі».

Паказаць камэнтары

XS
SM
MD
LG