Лінкі ўнівэрсальнага доступу

Літва адказала на словы калінінградзкага губэрнатара аб колькасьці яе насельніцтва


Міністэрства замежных спраў Літвы адказала на словы часовага выканаўцы абавязкаў губэрнатара Калінінградзкай вобласьці Мікалая Цуканава пра тое, што ў Літве «засталося ўсяго каля 1,4 мільёна жыхароў», паведамляе ТВ «Дождж». Адказ ведамства паступіў у рэдакцыю «Дажджу» ў панядзелак, 27 ліпеня.

«Паводле дадзеных Дэпартамэнту статыстыкі Літоўскай Рэспублікі, у пачатку ліпеня 2015 году ў Літве пражывала больш за 2.900.000 жыхароў. Хібнасьць у статыстыцы, якую выкарыстаў губэрнатар Калінінградзкай вобласьці Расейскай Фэдэрацыі сп. М. Цуканаў, паменшыла колькасьць жыхароў Літвы „усяго“ ў два разы. Застаецца спадзявацца, што прадстаўляючы статыстычныя дадзеныя аб эканоміцы Калінінградзкай вобласьці РФ, губэрнатар не дапускае такіх непаразуменьняў», — заявілі ў МЗС Літвы.

Заяву аб тым, што ў Літве «засталося ўсяго каля 1,4 мільёна жыхароў» Цуканаў зрабіў у гутарцы з прэзыдэнтам Расеі Ўладзімірам Пуціным на сустрэчы з арганізатарамі і ўдзельнікамі фэстывалю «Голосящий КиВиН», якая праходзіла ў Сьветлагорску 25 ліпеня.

«Хутка ня будзе каму прыяжджаць [у Калінінградзкую вобласьць]. Колькі ў Літве раней было ў савецкі час?» — спытаў Пуцін. Часовы выканаўца абавязкаў губэрнатара Калінінградзкай вобласьці адказаў, што ў савецкі час у Літве жылі больш за тры з паловай мільёны чалавек, а цяпер там «засталося ўсяго каля 1,4 мільёна жыхароў», перадае ТАСС.

Ваша меркаваньне

Паказаць камэнтары

XS
SM
MD
LG