Лінкі ўнівэрсальнага доступу

logo-print

Былы віцэ-прэзыдэнт ФІФА сваю віну не прызнаў


Суд Нью-Ёрка разглядае справу аб маштабнай карупцыі ў ФІФА

Былы віцэ-прэзыдэнт Міжнароднай фэдэрацыі футбольных асацыяцый (ФІФА) Джэфры Уэб не прызнаў сваю віну ў судзе Нью-Ёрка, дзе разглядалася справа аб маштабнай карупцыі ў ФІФА .

Ён быў адпушчаны пад даўгавое абавязальніцтва на 10 мільёнаў даляраў.

50-гадовы грамадзянін Вялікабрытаніі і Кайманавых выспаў, Джэфры Ўэб здаў свае пашпарты ФБР і павінен заставацца ў межах 20-кілямэтровага радыюсу ад будынка суду.

Даўгавое абавязальніцтва падпісалі яго жонка, грамадзянка ЗША, яе бацькі і бабуля, а таксама яшчэ 6 чальцоў сям'і.

Ўэб стаў першым былым чыноўнікам ФІФА, які паўстаў перад судом у сувязі са скандалам, які літаральна скалануў увесь футбольны сьвет.

Былы віцэ-прэзыдэнт міжнароднай футбольнай фэдэрацыі - адзіны зь сямі арыштаваных у Цюрыху футбольных чыноўнікаў, хто не аспрэчваў экстрадыцыю ў ЗША. Ён быў дастаўлены ў Нью-Ёрк з Швайцарыі 15 ліпеня.

Усяго па справе праходзяць 14 чалавек, якія абвінавачваюцца ў вымагальніцтве, рэкеце, адмываньні грошай, махлярстве і атрыманьні хабараў на суму ў 150 мільёнаў даляраў на працягу 24-х гадоў.

Абвінавачваньне чыноўнікам і прадпрымальнікам было прад'яўлена судом Нью-Ёрка ў траўні.

XS
SM
MD
LG