У Паўднёвай Карэі супрацоўнік Нацыянальнай выведкі знойдзены мёртвым у аўтамабілі на горнай дарозе. Яго сьмерць зьвязваюць з шэрагам выкрытых фактаў праслухоўваньня тэлефонаў. Гаворка ідзе пра сакрэтныя апэрацыі па рэгістрацыі размоваў і вызначэньні месцазнаходжаньня абанэнтаў напярэдадні прэзыдэнцкіх выбараў 2012.
Урад і Нацыянальная выведвальная служба адпрэчваюць абвінавачваньні апазыцыі ў тым, што абсталяваньне і праграмнае забесьпячэньне, закупленае ў італьянскай кампаніі, ужывалася для праслухоўваньня тэлефонных размоваў грамадзян Паўднёвай Карэі. Улады сьцьвярджаюць, што клапаціліся аб павышэньні эфэктыўнасьці кампутарных сыстэмаў у сувязі з пагрозамі, якія сыходзяць ад Паўночнай Карэі.
Як паведамляе Бі-бі-сі, спасылаючыся на інфармацыю свайго карэспандэнта ў Паўднёвай Карэі, супрацоўнік выведкі пакінуў перадсьмяротную запіску, у якой напісаў, што праслухоўваньне вялося менавіта дзеля выяўленьня небясьпечных сувязяў з агентамі КНДР, а не для ачарненьня палітычных апанэнтаў дзейнага прэзыдэнта краіны.
Выведка Паўднёвай Карэі мае сумнеўную рэпутацыю яшчэ з часоў пераходу краіны да дэмакратыі ў 1980-х гадах і лічыцца адказнай за выкраданьні і забойствы. На цяперашнюю выведвальную службу падобныя падазрэньні не распаўсюджваюцца, тым ня менш, яе супрацоўнікі аказваліся аб’ектамі некалькіх расьсьледаваньняў, у прыватнасці, у сувязі з умяшаньнем у выбарчыя кампаніі.
Апазыцыйныя дзеячы ў Паўднёвай Карэі сьцьвярджаюць, што спэцслужбы далёкія ад выкананьня «палітычнага нэўтралітэту», парушаюць закон і зьяўляюцца палітычнай прыладай у руках прэзыдэнта.
