Афіша
У Горадні ад ЦСК «Нёман» ў 8 раніцы стартуе 5-ы Міжнародны маратон Горадня — Друскенікі. Усяго ў Літву пабягуць 250 спартоўцаў з 14 краін.
Ад сёньня на дарогах паболее фотарадараў ДАІ. Датчыкі разьмесьцяць на М-3 (Менск — Віцебск, 53-ы км), М-5 (Менск — Гомель, 37-ы км), Р-53 (Менск — Барысаў, 1-ы і 38-ы км), Р-65 (Дзяржынск — Заслаўе, 0-ы км), Р-80 (Слабада — Радашкавічы, 10-ы км), Н-8365 (Фаніпаль — Пераможнае, 3-і км).
На Беласточчыне выступам гурту Port Mone закончыцца фэстываль «Басовішча».
На пляжы возера Сосна ў Віцебскай вобласьці пройдзе дзень Нэптуна (вёска Доўжа). Разам з тым купаньне празь якасьць вады абмежаванае ў 27 зонах адпачынку, у тым ліку на гарадзкіх пляжах Бабруйску, Рэчыцы, Салігорску, Гомля, на возеры Вірскае ў Жлобіне, у рацэ Вязынцы ў аграгарадку Чырвоная Слабада ды інш.
Гэты дзень у гісторыі
1930 — па абвінавачваньні ў прыналежнасьці да «Саюзу вызваленьня Беларусі» арыштаваны Максім Гарэцкі.
1972 — Івану Мележу і Івану Шамякіну прысвоеныя званьні народных пісьменьнікаў Беларусі.
1988 — у Віцебску пабудаваны летні амфітэатар. Менавіта тут штогод праводзіцца «Славянскі базар у Віцебску».
1994 — прэзыдэнтам Украіны стаў Леанід Кучма.
2009 — у Менску завяршыў працу V зьезд беларусаў сьвету.
У гэты дзень нарадзіліся
1869 — Лявон Вітан-Дубейкаўскі, беларускі архітэктар, пэдагог ды грамадзкі дзяяч.
1912 — Аляксей Анішчык, беларускі пісьменьнік-мэмуарыст, пэдагог, журналіст, грамадзкі дзяяч.
1915 — Антон Шукелойць, настаўнік з Ашмяншчыны, актыўны ўдзельнік жыцьця беларускай дыяспары ў ЗША. Шматгадовы старшыня Беларуска-Амэрыканскага задзіночаньня, сябра рэдакцыі газэты «Беларус», сябра Беларускага інстытуту навукі і мастацтва ў Нью-Ёрку. Да свайго 100-гадовага юбілею Антон Шукелойць даў інтэрвію Радыё Свабода, гл. пазьней на сайце.
1971 — Віталь Клічко, украінскі баксёр і палітык, мэр Кіева.
У гэты дзень памерлі
2010 — рэжысэр, сцэнарыст Ігар Дабралюбаў, аўтар незабыўнага фільму «Белыя росы» .
Цытата
Найбольш яснасьці маюць людзі ў саўсім маладым ці саўсім старым веку. А людзі веку сярэдняга ня маюць на тое часу сярод клопату і клуму жыцьця.
Максім Гарэцкі
