На легендарным возеры ў Кіргізіі знаходзіцца сакрэтная база ваенна-марскога флёту Расіі, дзе выпрабоўваюць тарпэдныя катэры.
Кілямэтры калючага дроту і ні душы вакол. Гэта сакрэтная база ваенна-марскога флёту Расеі на Ісык-Кулі. Мала хто з кіргізаў быў па той бок агароджы. А калі і быў, то даваў падпіску пра неразгалошваньне.
База прызначаная для правядзеньня выпрабаваньняў марскога падводнага ўзбраеньня. Здымаць і нават фатаграфаваць аб’ект нельга. Уезд на базу перакрыты бэтоннымі шлягбаўмамі, ля ўваходу — сапраўдны ДЗОТ з адтулінамі для кулямёта.
Глыбіня ў некаторых месцах дасягае 400 мэтраў. Вада празрыстая, салёная, таму ўмовы максымальна набліжаныя да тых, якія былі б, калі б выпрабаваньні праводзілі дзе-небудзь у адкрытым моры.
Акрамя ўсяго іншага тут выпрабоўвалі легендарныя «Шквал» — тарпэды, ад якіх ня можа ўхіліцца ніводзін надводны карабель. Зрэшты, пра тое, дзе дакладна праводзяцца выпрабаваньні, ніхто, акрамя саміх маракоў, ня ведае. Гэта ваенная таямніца.