Канцлер Нямеччыны Ангела Мэркель дала інтэрвію аднаму з самых папулярных нямецкіх відэаблогераў, дзе асудзіла легалізацыю аднаполых шлюбаў.
Зьяўляючыся лідэрам кансэрватыўнага Хрысьціянска-дэмакратычнага саюзу, яна пазыцыянуе сябе як перакананая хрысьціянка, таму такая заява ня стала нечаканасьцю для прыхільнікаў канцлера.
Аднак у сьвятле рашэньня Вярхоўнага суду ЗША аб прызнаньні аднаполых шлюбаў легальнымі на ўсей тэрыторыі краіны выказваньне Мэркель выклікала нямала пытаньняў, піша The Independent.
У часе інтэрвію канцлер адзначыла, што гомасэксуальныя пары мусяць карыстацца тымі ж ільготамі, уключаючы падатковыя, як і ўсе астатнія. Яна падкрэсьліла, што выступае катэгарычна супраць любой праявы дыскрымінацыі, аднак удакладніла, што «трэба ўсё ж бачыць розьніцу».
«Шлюбам можна называць толькі саюз паміж мужчынам і жанчынай. Гэта маё разуменьне, але я падтрымліваю грамадзянскія шлюбы», — патлумачыла Мэркель.
Выданьне нагадвае, што пасьля таго, як у траўні па выніках рэфэрэндуму Ірляндыя легалізавала аднаполыя шлюбы, Мэркель адразу дала зразумець: у Нямеччыне такога ня будзе.
«Сёньня вельмі важны дзень для барацьбы з дыскрымінацыяй, і канцлер задаволеная гэтым. Але аднаполыя шлюбы не зьяўляюцца мэтай цяперашняга ўраду», — заявіў тады прэс-сакратар Мэркель.
На словы лідэра ФРГ ужо адрэагавалі ў Вялікабрытаніі. Афіцыйны прадстаўнік мясцовай ЛГБТ-супольнасьці выказаў зьдзіўленьне заявай канцлера. «Хіба хтосьці можа сапраўды падтрымліваць „барацьбу з дыскрымінацыяй“, калі яны вераць у тое, што аднаполыя шлюбы нельга прыраўноўваць да шлюбу?» — пытаецца ён.
Інтэрвію з Мэркель было апублікавана на YouTube у панядзелак. Менш чым за двое сутак ролік працягласьцю больш за паўгадзіны набраў больш за два мільёны праглядаў.