Расея заявіла, што будзе выступаць супраць праекту рэзалюцыі ААН аб стварэньні міжнароднага трыбуналу для судовага перасьледу асоб, якія маюць дачыненьне да зьбіцьця пасажырскага самалёта рэйсу MH17 у небе над Данбасам.
«На жаль, здаецца, што гэта спроба арганізаваць грандыёзнае палітычнае шоў, якое толькі шкодзіць намаганьням па пошуку вінаватых», — заявіў пасол Расеі ў ААН Віталь Чуркін. Ён таксама зазначыў, што ня бачыць «ніякай будучыні» для гэтай рэзалюцыі.
«Мы павінны дачакацца вынікаў расьсьледаваньня, а тады мы зможам думаць аб тым, як найбольш эфэктыўна падысьці да судовага разбору», — дадаў Чуркін.
Канчатковы даклад сьледзтва ў гэтай справе чакаецца ў кастрычніку.
