Лінкі ўнівэрсальнага доступу

Дзеля прэзыдэнцтва Калякін гатовы ахвяраваць адпачынкам


Ілюстрацыйнае фота

Ілюстрацыйнае фота

Як будуць адпачываць патэнцыйныя кандыдаты на прэзыдэнта гэтым летам? Як яны пераносяць сёлетнюю сьпякоту? Адказы прэтэндэнтаў на найвышэйшую пасаду ў Беларусі запісаў Уладзімер Глод.

Патэнцыйны кандыдат на прэзыдэнта ад кааліцыі «Народны рэфэрэндум» Тацяна Караткевіч сказала, што сёлета ў яе ня будзе адпачынку:

Тацяна Караткевіч

Тацяна Караткевіч

«Я не зьбіраюся адпачываць гэтым летам. Я задзейнічана ў сваёй кампаніі. А калі і выпадзе некалькі больш-менш вольных дзён, то гэта і будуць эпізоды адпачынку ў родных мясьцінах.

Звычайна я адпачываю на Беларусі. Люблю пабыць гэткім „дзікуном“ у лясной прасторы.

Сьпякоту я пераношу цярпіма. Праўда, п’ю больш вады, чым звычайна. І думаю пра тое, што зіма яшчэ далёка».

Прэтэндэнт на прэзыдэнта ад партыі «Справядлівы сьвет» Сяргей Калякін кажа, што ягоны адпачынак залежыць ад вынікаў выбараў:

Сяргей Калякін

Сяргей Калякін

«Усё залежыць ад таго, як будзе ісьці кампанія. Калі яна будзе праходзіць пасьпяхова, то летам адпачыць не давядзецца. І тады адпачынак для мяне будзе ўжо пасьля выбарчай кампаніі. Гэта, зразумела, калі мяне не абяруць. А калі абяруць, то застануся без адпачынку. Пакуль паўнавартаснага адпачынку з выездам кудысьці ў маіх плянах няма.

Адпачынак у розныя гады праводжу па-рознаму. Часам з жонкай едзем на мора. Часам адпачываем тут, пад Менскам. Люблю зьбіраць грыбы, ягады. Час ад часу ежджу на Віцебшчыну на радзіму маці. Там захаваўся наш дом, цяпер у ім жыве радня. Тады абавязкова лаўлю рыбу, бо там цудоўныя азёры.

А што тычыцца сьпякоты, то ня так часта ў нас бывае горача. Я з задавальненьнем пераношу цяперашняе надвор’е. Разумею, што гэта кароткі пэрыяд і што ён хутка скончыцца. І зноў пойдуць дажджы».

Прэтэндэнт на прэзыдэнцтва ад Лібэральна-дэмакратычнай партыі Сяргей Гайдукевіч да завяршэньня выбарчай кампаніі на адпачынак не разьлічвае:

Сяргей Гайдукевіч

Сяргей Гайдукевіч

«Адпачынак? Гэта ніяк не атрымліваецца. Нават тэарэтычна немагчыма да 11-га кастрычніка. Чаму немагчыма? Кожны разумее — падчас выбарчай кампаніі не да адпачынку.

Пераношу ці не пераношу я сьпякоту? Для мяне такога пытаньня не існуе. Я вельмі станоўча ўспрымаю гарачыню. Я, як гэта кажуць, цеплалюбная расьліна. Мабыць таму, што я рыбак. Я, можна сказаць, прафэсійны рыбак, стаю заўжды на сьпякоце ў кепачцы. Таму ў мяне заўжды загар на твары, рукі загарэлыя. Нядаўна я быў на расейскім тэлебачаньні. Яны пытаюцца: дзе вы загаралі? Я ім адказваю: у беларускай Гішпаніі».

Адпачынак не ўваходзіць і ў бліжэйшыя пляны патэнцыйнага кандыдата на прэзыдэнта «абібока» Юрыя Шульгана, кажа кіраўнік ягонай ініцыятыўнай групы Павал Канавальчык:

Павал Канавальчык

Павал Канавальчык

«Плянуем адпачыць. Але пасьля кампаніі.

У Юрыя найлепшы адпачынак — лясны. Ён аматар пабадзяцца па лесе, пазьбіраць грыбы, ягады.

А сьпякоту мы пераносім нармальна. Разам з Шульганом правялі выходныя ў сяброў на лецішчы. Усё было добра».

Патэнцыйны прэтэндэнт на пасаду прэзыдэнта ад Аб’яднанай грамадзянскай партыі Анатоль Лябедзька звычайна ігнаруе летні адпачынак наагул:

Анатоль Лябедзька

Анатоль Лябедзька

«Я прыхільнік зімовага адпачынку. Летняга адпачынку ў мяне звычайна няма. Найлепшае, што часам адбываецца — на тры-чатыры дні выехаць на Балтыку. А ўзімку, калі не было пахаваньня бацькі і калі я не зламаў нагу, то на тыдзень вырываўся ў горы. Люблю экстрэмальны адпачынак — лыжы, горы. Вось гэта маё.

А пра сьпякоту. Я шмат часу аддаваў фізкультуры. І футбол у мяне быў, і хакей, і яшчэ шмат чаго. Даводзілася езьдзіць на спаборніцтвы: і за школу, і за ўнівэрсытэт. А там даводзілася выступаць пры любым надвор’і. Карацей, сьпякоту пераношу нармальна. Горача. Але ня болей за тое. Як кажуць, лепш маленькі Ташкент, чым вялікая Сыбір».

XS
SM
MD
LG