Лінкі ўнівэрсальнага доступу

3 ліпеня ў Магілёве: беларускія вышыванкі і бел-чырвона-белыя сувэніры


Маладая пара з Магілёва у вышыванках: «Беларусы не павінны саромецца быць самімі сабой».

Маладая пара з Магілёва у вышыванках: «Беларусы не павінны саромецца быць самімі сабой».

У Магілёве адбылося сьвята нацыянальнай культуры. У праграме урачыстасьцяў, прымеркаваных да афіцыйнага Дня незалежнасьці, яно мела назву «Беларусь жыцьця майго крыніца».

Месцамі для сьвята абралі Камсамольскі сквэр і пешаходную вуліцу Ленінскую. Былі тут і беларускія нацыянальныя строі, і сувэніры ў бел-чырвона-белых колерах.

На сьвята прыйшло нямала народу. Багата хто прывёў з сабою дзяцей. На падыходзе да сквэру пытаю ў мінакоў «Якім яны б хацелі бачыць сьвята нацыянальнай культуры».

«Мы б хацелі чуць болей беларускай мовы. А ў нас так атрымліваецца, што пераважае расейская мова. Мы мала чуем беларушчыны», адказвае на пытаньне сямейная пара сталага веку. Жанчына ў блузцы зь беларускай вышыванкай. Кабета кажа, што апранае яе на важныя ўрачыстасьці.

«Такія, на жаль, мы і ёсьць цяпер беларусы, — працягваюць суразмоўцы. — Выракліся сваёй мовы, культуры ды й зьмянілася і мэнтальнасьць у пэўнай ступені. Можа ня ўсе выракліся, але не даюць Беларушчыне разьвіцца».

У беларускім роўныя ўсе.

У беларускім роўныя ўсе.

Чым не Пагоня?

Чым не Пагоня?

«Павінны прапагандавацца на такіх сьвятах нацыянальныя традыцыі, — кажа наступная суразмоўніца. На думку дзяўчыны, удзельнікі і наведнікі такога сьвята мусяць апранацца ў нацыянальныя строі. «Беларуская мова павінна гучаць, — зазначае яна, — каб чулі людзі яе. Песьні на беларускай мове павінны быць».

У самім сквэры беларускага было няшмат. Тутэйшае паветра было насычана дымам з мангалаў, на якіх гатавалі шашлыкі. Тут прадавалі сувэніры, салодкія ласункі для дзяцей, выпіўку ды закуску для дарослых.

Паветра насычанае дымам ад мангалаў, на якіх гатуюць шашлыкі.

Паветра насычанае дымам ад мангалаў, на якіх гатуюць шашлыкі.

Акрамя шашлыкоў нацыянальнымі стравамі прэтэндуюць стаць і сушы.

Акрамя шашлыкоў нацыянальнымі стравамі прэтэндуюць стаць і сушы.

Беларускія песьні гучалі на пешаходнай вуліцы Ленінскай. Музыкі зьбіралі ля сябе немалыя грамады мінакоў. Некаторыя з іх наважваліся на танцы. Тут жа прадаваліся і беларускія сувэніры. Нямала рамесьнікаў апрануліся ў нацыянальныя строі.

Музыкі

Музыкі

Беларускія сувэніры.

Беларускія сувэніры.

«Вышыванка — гэта сымбаль Беларусі. Гэта наш гонар, — зазначае адзін з рамесьнікаў.

«Вышыванка да нас прыйшла здавён. Да жалю мы крыху ў свой час не туды пайшлі. І пакрысе сталі забыць наша старадаўняе. Нашы звычаі і абрады. Але нягледзячы ні нашто гэта ўсё будзе вяртацца да нас», падсумоўвае суразмоўца.

Рамесьнік: «Нацыянальнае беларускае вернецца».

Рамесьнік: «Нацыянальнае беларускае вернецца».

«Мы рамесьнікі маем дэманстраваць наш беларускі нацыянальны строй, — працягвае гутарку майстрыха. — Я сама з Шклова і мой строй набліжаны да нацыянальнага. Крыху стылізаваны праўда. Я не лічу, што беларусы саромецца апранацца па-беларуску. Цяпер жа ўсё наша самабытнае ўваходзіць у моду», зазначае яна.

«У Менску цяпер дужа папулярныя ў моладзі рэчы, якія плятуцца на бёрдах, — заўважае суразмоўніца. — Тыя ж павязкі, гальштукі носяць, менавіта з нашым беларускім нацыянальным арнамэнтам. Мо, пакуль, ня так культывуюцца блюзкі вышываныя, хаця і яны сустракаюцца. І гэта ўваходзіць паволі ў моду. Гэтаму цяпер — зялёнае сьвятло».

Калі рамесьнікі былі ў нацыянальных строях, то наведнікаў сьвята апранутых гэтак жа было няшмат.

«Мы летась езьдзілі ва Ўкраіну і купілі там жонцы вышыванку. З салідарнасьці пазьней і я купіў сабе беларускую», кажа адзін зь нямногіх наведнікаў у вышыванай беларускай кашулі.

«Хацелася б, каб на такім сьвяце больш было людзей апранутых па нацыянальнаму. Каб адчувалася, што сьвята беларускае. Вось у Кіеве такое ўкраінскае сьвята было дужа прыгожае. У беларускіх сьвятах беларускага ж калярыту нам не хапае. Мне падаецца, што мы саромеемся быць самі сабою.

На Дзень гораду да нас падышла жанчына з Расеі і папрасіла з намі сфатаграфавацца. Нават людзі з Расеі прыяжджаюць і хочуць пабачыць тут нешта самабытнае. Хочуць бачаць тут беларусаў».

Гэтак віталі на сьвяце старшыню гарвыканкаму Ўладзімера Цумарава.

Гэтак віталі на сьвяце старшыню гарвыканкаму Ўладзімера Цумарава.

Бел-чырвона-белае – пасуе дзявочай руцэ.

Бел-чырвона-белае – пасуе дзявочай руцэ.

На сьвяце дэманстравалі сваё майстэрства мясцовыя рыцары з клюбу «Барысфэн». Ахвотнікі мелі магчымасьць пастраляць з луку, ды прымераць дасьпехі. Лідэр магілёўскіх рыцараў Павал Пастухоў гаворачы пра адметнасьці беларускага нацыянальнага сьвята заўважае:

«На такіх сьвятах мусіць быць шмат рэчаў, якімі адметная беларуская нацыя. Напрыклад беларускае рыцарства. Яно мае прысутнічаць на ўсіх нацыянальных сьвятах. Яно дэманструе, што беларускае дзяржава — рыцарская дзяржава, якая ў свой час была ад Балтыйскага мора да Чорнага і мае багатую гісторыю».

Магілёўскі рыцар Павал Пастухоў.

Магілёўскі рыцар Павал Пастухоў.

Нямала беларускіх сувэніраў на сьвяце былі вырабленыя ў бел-чырвона-белых колерах. Іх з ахвотай куплялі наведнікі.

Беларускія ручнікі на пешаходнай вуліцы Ленінскай.

Беларускія ручнікі на пешаходнай вуліцы Ленінскай.

На вуліцы Ленінскай.

На вуліцы Ленінскай.

Паказаць камэнтары

XS
SM
MD
LG