Лінкі ўнівэрсальнага доступу

Чарнагорыя сёлета можа стаць новым чальцом НАТО


У НАТО вызначыліся з плянамі новага пашырэньня. Крыніцы расейскай газэты «Коммерсант» у альянсе ідэальным кандыдатам называюць сёньня толькі Чарнагорыю.

Большасьць чарнагорцаў гатовыя падтрымаць ўступленьне ў НАТО. Пра гэта сьведчаць вынікі апытаньняў, абнародаваныя на мінулым тыдні. Іх правялі два уплывовыя балканскія агенцтвы — Strategic Marketing і Damar. Атрыманыя сацыёлягамі вынікі падобныя: за ўступленьне ў НАТО прагаласавалі б, па дадзеных аднаго агенцтва, 47%, супраць — 43%, па дадзеных іншага, за — 44%, супраць — 40%.

Такім чынам, упершыню ў Чарнагорыі колькасьць прыхільнікаў далучэньня да НАТО перавысіла колькасьць праціўнікаў. Вынікі сацапытаньняў агучыў на сусьветным форуме па бясьпецы GLOBSEC ў Браціславе чарнагорскі прэм’ер Міла Джуканавіч. Там жа Чарнагорыі быў пасланы ясны сыгнал: менавіта яна будзе наступным сябрам НАТО.

Прэм’ер Вялікабрытаніі Дэвід Кэмэран заявіў: «Існуюць важкія прычыны, каб Чарнагорыя стала членам альянсу». Прадстаўнік Славаччыны ў НАТО Томаш Валашек выказаўся больш канкрэтна: «Запрашэньне Чарнагорыі паступіць абавязкова».

А на днях генэральны сакратар альянсу Енс Столтэнбэрг пацьвердзіў: рашэньне па Чарнагорыі будзе прынятае ў сьнежні. Уступленьне ў НАТО ў якасьці стратэгічнай мэты чарнагорскія ўлады абвясьцілі ў 2010 годзе, пасьля чаго хутка дамагліся Пляну дзеяньняў па сяброўстве ў альянсе, а затым і статусу кандыдата.

«Чарнагорыя — адзінае ненатаўскае зьвяно ў ланцугу натаўскіх краінаў, усе нашы суседзі па Адрыятыцы — чальцы НАТО, і іншага шляху гарантаваньня бясьпекі ў нас няма, — патлумачыў ключавыя матывы краіны крыніца» Коммерсанта " ў чарнагорскіх урадавых колах.- Акрамя таго, сяброўства ў НАТА — самая надзейная гарантыя для інвэстараў, ад якіх мы моцна залежым «. Чарнагорцы чакалі запрашэньня на саміце НАТО ў Кардзіфе ў верасьні, аднак у альянсе прынялі Саламонава рашэньне: з запрашэньнем Чарнагорыі вызначацца кіраўнікі МЗС краінаў альянсу ў сьнежні 2015 году, не чакаючы наступнага саміту ў Варшаве. Асноўнымі прэтэнзіямі да чарнагорцаў мінулай восеньню былі незавершаная рэформа сэктару абароны і бясьпекі, а таксама недастатковы ўзровень грамадзкай падтрымкі. Сёньня ў НАТО прызнаюць: Чарнагорыя прасунулася ў абодвух напрамках. А камандуючы сіламі НАТО ў Эўропе генэрал Філіп Брыдлаў нядаўна абвясьціў: у ваенным пляне Чарнагорыя гатова да ўступленьня, і рашэньне аб яе прыёме будзе чыста палітычным.

Частка чальцоў альянсу стрымана ставяцца да яго пашырэньня, мяркуючы, што НАТО ўсё складаней «пераварваць» новых чальцоў і што можа ўзьнікнуць новы раздражняльнік ў адносінах з Расеяй. Але нават з улікам гэтай боязі многія палітыкі і экспэрты лічаць, што шанцы Падгорыцы на ўступленьне вялікія.

«Чарнагорыя — ідэальны кандыдат», — заявіла «Коммерсанту» дыпляматычная крыніца ў адной з натаўскіх дзяржаваў. Паводле яе словаў, у агляднай будучыні ніводная іншая краіна ня мае рэальных шанцаў на ўступленьне. Крыніца «Коммерсанта» ў чарнагорскіх ўрадавых колах мяркуе, што далучэньне рэспублікі да НАТО не прывядзе да пагаршэньня яе адносінаў з Масквой. «Па-першае, мы ніколі не хавалі ад Расеі нашых плянаў, — растлумачыў ён. — Па-другое, Масква жорстка выступае супраць ўступленьня ў НАТО перш за ўсё суседніх зь ёй краінаў. Па-трэцяе, Расея бачыць пагрозу ў набліжэньні да сваіх межаў ваеннай інфраструктуры альянсу, але Чарнагорыя не плянуе разьмяшчаць на сваёй тэрыторыі базы».

XS
SM
MD
LG