Лінкі ўнівэрсальнага доступу

logo-print

Справу пра катастрофу малайзійскага Боінга могуць перадаць у міжнародны трыбунал


Ukraine -- Bunches of flowers and poster "Putin, world had not excuse" are near the embassy of the Netherlands in memory of killed people, Kyiv, 21Jul2014

Ukraine -- Bunches of flowers and poster "Putin, world had not excuse" are near the embassy of the Netherlands in memory of killed people, Kyiv, 21Jul2014

Усе пяць краін, якія расьсьледуюць зьбіцьцё над усходам Украіны авіяляйнэра «Малайзійскіх авіяліній» рэйсу MH17, заклікаюць стварыць міжнародны трыбунал для суду над вінаватымі.

Як заявіў у чацьвер амбасадар Малайзіі ў ААН Рамлан Бін Ібрагім, яны спадзяюцца, што праект рэзалюцыі аб гэтым могуць прадставіць на разгляд Рады бясьпекі ААН ужо ў ліпені.

На мінулым тыдні экспэрты-юрысты ўжо падалі ў Раду бясьпекі для папярэдняга вывучэньня праект статута такога трыбуналу і праект рэзалюцыі Рады бяспекі аб яго стварэньні, паведамілі дыпляматы.

А на гэтым тыдні ідэю ўхвалілі ўсе пяць краін, якія сумесна расьсьледуюць трагедыю, — Малайзія, якой належаў самалёт, Украіна, над якой ён быў зьбіты, а таксама Нідэрлянды, Аўстралія і Бэльгія, якія страцілі ў самалёце найбольш сваіх грамадзян.

Як заявіла міністар замежных спраў Аўстраліі Джулія Бішоп, урад яе краіны адданы ідэі супрацоўнічаць з міжнароднай супольнасьцю, каб дамагчыся справядлівасьці для сем’яў ахвяр.

Ініцыятары стварэньня міжнароднага суду пры падтрымцы ААН спадзяюцца, што гэта зможа прымусіць Расею да супрацоўніцтва.

Іх аргумэнтацыя заключаецца ў тым, што Расея будзе вымушана альбо пагадзіцца з гэтым, або скарыстацца сваім правам вета ў Радзе бясьпекі і рызыкаваць тым, што яе палічаць галоўнай перашкодай у ажыцьцяўленьні правасудзьдзя над масавымі забойцамі цывільных людзей. Але і ў такім выпадку суд можа быць створаны рашэньнем Генэральнай асамблеі ААН, у якой правы вета не існуе ні ў каго.

Раней Рада бясьпекі ААН ужо прымала рэзалюцыю, у якой заклікала прыцягнуць да адказнасьці вінаватых у трагедыі.

Між тым у Крамлі адмовіліся камэнтаваць папярэднія першыя паведамленьні пра магчымасьць стварэньня такога суду.

Як сказаў з гэтай нагоды Рамлан Бін Ібрагім, Малайзія ўжо папярэдне абмяркоўвала гэтае пытаньне з Расеяй, але, паводле яго слоў, яшчэ рана казаць, Масква падтрымае такую рэзалюцыю.

Авіяляйнэр «Боінг-777» авіякампаніі «Малазійскі авіялініі» рэйсу MH17 з Амстэрдама ў Куала-Лумпур быў зьбіты ў небе над часткай усходу Ўкраіны, захопленай падтрымоўванымі Расеяй сэпаратыстамі, 17 ліпеня 2014 года. Загінулі ўсе 298 чалавек, якія знаходзіліся на борце. Каля двух трацін зь іх былі грамадзяне Нідэрляндаў, і Ўкраіна перадала расьсьледаваньне справы гэтай дзяржаве.

Зараз у Нідэрляндах працягваецца два асобных сьледзтва: Рада расследаваньняў па пытаньнях бясьпекі вывучае падрабязнасьці катастрофы, і яе справаздача чакаецца ў кастрычніку, а пракуратура расьсьледуе крымінальную справу аб катастрофе і мае на мэце вызначыць вінаватых, і, верагодна, назаве падазраваных пасьля справаздачы Рады расьсьледаваньняў у пытаньнях бясьпекі. Хоць фармальна яшчэ не выключана ні адна вэрсія, асноўнай лічаць зьбіцьцё самалёта з зэнітна-ракетнага комплексу «Бук», які прадаставіла для сэпаратыстаў Расея. Гэта выклікае здагадку, што сярод названых вінаватымі могуць апынуцца грамадзяне Расеі.

XS
SM
MD
LG