Паводле прадстаўнікоў Эўразьвязу, першая фаза апэрацыі, у якой будуць задзейнічаны караблі і самалёты, прадугледжвае збор выведных дадзеных.
У ходзе другой фазы мяркуецца праводзіць захоп і зьнішчэньне суднаў, якія належаць гандлярам людзьмі, і арышт асобаў, якія маюць дачыненьне да нелегальнай перавозкі мігрантаў.
У ходзе трэцяй фазы апэрацыя будуць праводзіцца ў лібійскіх тэрытарыяльных водах і, магчыма, на тэрыторыі самой Лібіі. Для пераходу да другога і трэцяга этапу апэрацыі Эўразьвязу спатрэбіцца рэзалюцыя Рады Бясьпекі ААН і згода лібійскага ўраду.
Кіраўніца зьнешнепалітычнага ведамства ЭЗ Фэдэрыка Магерыні, выступаючы сёньня ў Люксэмбургу на пасяджэнні Рады кіраўнікоў МЗС краінаў ЭЗ, заявіла:
«Менш чым два месяцы таму Эўрапейская рада паставіла перад намі заданьне правесьці апэрацыю ў Міжземным моры, каб у першую чаргу ўратаваць жыцьцё людзей, а таксама разбурыць бізнэс-мадэль гандляроў людзьмі і кантрабандыстаў. Гэтая апэрацыя не скіраваная супраць мігрантаў. Яна накіраваная супраць тых, хто нажываецца на іх жыцьці і сьмерці».
Ад пачатку гэтага году загінулі ня менш чым 1800 мігрантаў, якія спрабавалі дабрацца да Эўропы па Міжземным моры.
