Мітынг пачаўся ў панядзелак у 11:00 раніцы, піша «Новая газета».
На сход выйшла каля 500 чалавек. У асноўным, па словах прысутных, гэта жыхары Кіеўскага раёну, мікрараёну «Кастрычніцкі рынак», які мяжуе з аэрапортам.
Мясцовыя жыхары выкрыкваюць: «Спыніце вайну!», «Вярніце нам жыльлё, у нас разграмілі дамы!», «Ідзіце прэч усе». Мітынг пачаўся за 150 мэтраў ад будынку адміністрацыі, але да 13:00 пачаў перамяшчацца пад вокны будынку.
Прысутныя перакрылі вуліцу Арцёма, галоўную ў Данецку. Транспартны рух на вуліцы спынены, утварылася чарга з тралейбусаў.
Да мітынгоўцаў у Данецку прыйшоў лідэр баевікоў Аляксандар Захарчанка.
Агульныя патрабаваньні мітынгоўцаў — спыніць баявыя абстрэлы, якія вядуць войскі «ДНР» з тэрыторыі мікрараёну «Кастрычніцкі рынак». Жыхары абвінавачваюць сэпаратыстаў, якія сваімі дзеяньнямі выклікаюць у адказ агонь Узброеных сіл Украіны.
У нядзелю 10 жыхароў гораду былі параненыя, двое — загінулі.
Гэта першы маштабны мітынг у Данецку з антываеннымі заклікамі.
