Начальнік падразьдзяленьня авіяцыйнай бясьпекі Гомельскага філіялу «Белаэранавігацыі» паспрабаваў праверыць працу аховы арыгінальным спосабам, падкінуўшы інфармацыю аб «замінаваньні» аэрапорту.
БелаПАН паведамляе, што 10 чэрвеня у дачыненьні да гэтага 47-гадовага службоўца была ўзбуджаная справа па артыкуле 340 Крымінальнага кодэксу (заведама ілжывае паведамленьне аб небясьпецы)
Паводле інфармацыі гомельскага транспартнага пракурора Сяргея Казакевіча, у ноч на 10 чэрвеня начальнік падразьдзяленьня, знаходзячыся на працоўным месцы, раздрукаваў старонкі з тэкстам «Вы замінаваныя. Прывітаньне ад спэцназу» і расклаў у розных месцах аэрапорту. Ахова хутка зрэагавала на выяўленае паведамленьне аб небясьпецы, на тэрыторыю аэрапорту прыбылі прадстаўнікі ўсіх службаў. Быў перакрыты доступ да аэрапорту, узяты ў ачапленьне самалёт, які прыбыў, а адмысловая група праверыла тэрыторыю, але выбуховых прыладаў ня выявіла.
Раніцай начальнік падразьдзяленьня прызнаўся ў зробленым і патлумачыў, што такім чынам хацеў праверыць пільнасьць аховы аэрапорту.
Аднак супрацоўнікі аховы не знаходзяцца ў яго падпарадкаваньні, і ён ня меў паўнамоцтваў праводзіць падобныя праверкі. Начальніка адхілілі ад пасады.
Санкцыя артыкула 340 КК прадугледжвае пакараньне ад штрафу да пяці гадоў пазбаўленьня волі.
