Лінкі ўнівэрсальнага доступу

logo-print

Менск наракае на «непаваротлівасьць амэрыканскай бюракратычнай машыны»


Менск, Міністэрства замежных справаў

Менск, Міністэрства замежных справаў

Камэнтуючы падаўжэньне санкцыяў супраць беларускіх уладаў, МЗС Беларусі адмовіўся ад крытыкі рашэньня прэзыдэнта ЗША Барака Абамы.

Прэс-сакратар МЗС Дзьмітры Мірончык зьвярнуў увагу, што ў рашэньні прэзыдэнта ЗША не зьмяшчаецца нічога новага.

«Тэкст цяперашняга выканаўчага загаду цалкам супадае з тэкстам рашэньня 2014 году. Гэта сьведчыць пра непаваротлівасьць амэрыканскай бюракратычнай машыны, яе слабую ўспрымальнасьць да таго, што адбываецца ў сьвеце, у тым ліку ў нашым рэгіёне. У сувязі з гэтым няма ніякага сэнсу выступаць з крытыкай дадзенага рашэньня прэзыдэнта ЗША», — цытуе БелаПАН прэс-сакратара МЗС.

Па словах Мірончыка, апошнім часам назіралася «пэўнае паляпшэньне беларуска-амэрыканскіх адносінаў». Тым ня менш, сказаў ён, «рознагалосьсі, у тым ліку прынцыповага характару, захоўваюцца». «Разыходжаньні ў ацэнках, меркаваньнях і падыходах будуць і надалей. Аднак вызначацца нашы адносіны павінны ня столькі рознагалосьсямі, колькі агульнымі інтарэсамі і адказнымі дзеяньнямі ў галіне глябальнай і рэгіянальнай бясьпекі і па іншых актуальных пытаньнях міжнароднага парадку дня», — падкрэсьліў ён.

Кіраўнік праўладнага аналітычнага цэнтру «EcooM» Сяргей Мусіенка ў інтэрвію Радыё Свабода таксама зрабіў акцэнт на «непаваротлівасьці» зьнешняй палітыкі ЗША.

«Палітыка ЗША — непасьлядоўная, дваістая, нясталая, і да гэтага ўжо, напэўна, увесь сьвет прывык. Яны больш за 50 гадоў ужывалі санкцыі супраць Кубы, і хоць увесь сьвет даўно разумеў, што гэта не дае ніякага плёну, ЗША толькі цяпер пайшлі на нейкае збліжэньне. А з намі, я думаю, нейкія такія традыцыі згулялі. Абуральна не само падаўжэньне санкцыяў, а тая фармулёўка, зь якой гэтае падаўжэньне было ажыцьцёўлена: маўляў, некаторыя дзеячы ўраду ствараюць праблемы для дзяржаўнай бясьпекі ЗША. Тут патрэбныя або пэўныя абвінавачаньні і канкрэтныя доказы, або фармулёўку трэба здымаць — яна не ўпрыгожвае Злучаныя Штаты Амэрыкі», — кажа экспэрт.

Але пры гэтым Мусіенка лічыць, што падаўжэньне санкцыяў не перакрэсьлівае тыя пазытыўныя тэндэнцыі ў беларуска-амэрыканскіх адносінах, пра якія шмат гаварылася апошнім часам.

«Я думаю, вялікі авіяносец ЗША, нагружаны ракетамі, не пасьпявае перабудавацца, і нейкія новыя сёньняшнія плыні не адбіваюцца так хутка ў рэальнасьці, на жаль. Жыцьцё ідзе далей, і нават у саміх ЗША зьяўляецца разуменьне, што падобнае падаўжэньне санкцыяў — гэта анахранізм. Тут, я думаю, таксама наклалася сытуацыя і па Расейскай Фэдэрацыі: здымаць санкцыі супраць Беларусі і рабіць больш жорсткімі санкцыі супраць Расеі — падобнае разьвіцьцё падзеяў, напэўна, проста ня ўкладвалася ў галаве палітычнага істэблішмэнту ЗША», — сказаў ён.

Паказаць камэнтары

XS
SM
MD
LG