Як паведамляе агенцтва Reuters, лік інфіцыраваных вірусам перавысіў сотню чалавек.
Міністэрства здароўя Паўднёвай Карэі паведамляе, што ўсе, для каго захворваньне аказалася сьмяротным, яшчэ да заражэньня пакутавалі ад сур’ёзных недамаганьняў. У паведамленьні адзначаецца, што за апошнія суткі выяўлена яшчэ 13 інфікаваных MERS. Такім чынам, афіцыйна іх колькасьць дасягнула 108. Усе новыя выпадкі зьвязаныя з распаўсюджваньнем інфэкцыі ў шпіталях.
Reuters адзначае, што ўсе выпадкі захворваньня ўдалося адсачыць да «нулявога пацыента» — грамадзяніна, які вярнуўся ў пачатку траўня з паездкі па Блізкім Усходзе, быў шпіталізаваны і пасьпеў заразіць некалькіх людзей да таго, як яму паставілі дыягназ і ізалявалі.
Упершыню блізкаўсходні рэсьпіраторны сындром (Middle East Respiratory Syndrome, MERS) быў выяўлены ў 2012 годзе ў Саудаўскай Арабіі. Як і грып, гэтая інфэкцыя распаўсюджваецца паветрана-кропельным шляхам.
Паводле статыстыкі Сусьветнай арганізацыі аховы здароўя, усяго ў сьвеце зафіксавана 1257 выпадкаў захворваньня MERS (з улікам цяперашняй успышкі), 448 інфікаваных ня выжылі. Найбольшая рызыка захворваньня існуе для людзей з аслабленым імунітэтам, хранічнай хваробай лёгкіх, дыябэтам і ныркавай недастатковасьцю. Вакцыны ад MERS пакуль не існуе.
