Лінкі ўнівэрсальнага доступу

Анісім хоча сабраць 2000 чалавек у ініцыятыўную групу на выбарах прэзыдэнта


Алена Анісім на сэсіі Кангрэсу за незалежнасьць 21 сьнежня 2014 году

Алена Анісім на сэсіі Кангрэсу за незалежнасьць 21 сьнежня 2014 году

Другая сэсія Кангрэсу за незалежнасьць пройдзе ў нядзелю, 7 чэрвеня, у менскай сядзібе БНФ.

Пра гэта Свабодзе паведаміла сябра каардынацыйнай рады Кангрэсу Алена Анісім. Дэлегаты абмяркуюць палітычную сытуацыю ў краіне. А вось вылучэньне самой спадарыні Анісім у якасьці патэнцыйнай кандыдаткі на прэзыдэнта адбудзецца крыху пазьней.

Карэспандэнт: «Спадарыня Алена, я памятаю ўстаноўчую сэсію Кангрэсу, якая праходзіла 21 сьнежня 2014 году ў гатэлі „Вікторыя“. На ёй прынялі маніфэст супраць расейскага імпэрыялізму. І тады арганізатары, а вы былі ў іх ліку, плянавалі сабраць мільён подпісаў беларусаў пад гэтым дакумэнтам. А літаральна пяць дзён таму я чуў, як Юры Чавусаў сказаў на Сойме БНФ, што ён паставіў свой подпіс пад электронным варыянтам маніфэсту, і гэты подпіс, падобна, быў адзіны. Чаму так атрымліваецца?»

Анісім: «Справа ў тым, што ў нас пакуль малавата сіл, каб усе подпісы перанесьці ў электронны варыянт. А з другога боку, гэтая справа яшчэ сапраўды не набрала ў нас размаху. Людзі цікавяцца, дзе і калі можна падпісацца. Але галоўнае, калі яны дойдуць да гэтага. Я спадзяюся, што пасьля нашай палітычнай сэсіі, калі мы надамо розгаласу гэтай справе, людзі пачнуць больш актыўна падпісваць маніфэст.

Задача пра мільён подпісаў з парадку дня не здымаецца. Але паглядзіце, якая цяпер сытуацыя. Людзі разгубленыя. А зь іншага боку, зьяўляюцца такія целарухі некаторых вядомых палітыкаў, якія наагул ня ведаеш, як расцэньваць. Яны не далучаюцца да нас на самым пачатку, а пасьля пачынаюць перахопліваць ідэі. Гэта добра, што ідэі жывуць. Але ж, па вялікім рахунку, гэта ня так робіцца».

Карэспандэнт: «Каго вы запрасілі на другую сэсію?»

Анісім: «Мы запрашалі лідэраў многіх палітычных партыяў паўдзельнічаць у нашай палітычнай сэсіі. Хто зь іх будзе — пабачым. Будуць і прадстаўнікі грамадзтва, а ня толькі адны палітыкі. Таксама дамовіліся з двума экспэртамі — Сяргеем Нікалюком і Андрэем Фёдаравым, якія ў нас выступяць.

Мы робім тое, што раней і плянавалі: сабралі кангрэс, прынялі маніфэст, стварылі раду, правялі адну сэсію, зараз зьбіраем другую па той палітычнай кампаніі, якая ў нас сёлета праводзіцца. Мы фармулюем сваё бачаньне прэзыдэнцкай кампаніі і выказваем умовы, пры якіх мы будзем лічыць, што гэтая кампанія сапраўды дэмакратычная, празрыстая і ў ёй мае сэнс удзельнічаць.

Наступны этап, над якім я ўжо пачала працаваць, — гэта стварэньне сваёй ініцыятыўнай групы. Да яе далучаюцца грамадзяне з розных рэгіёнаў Беларусі. Мы ставім задачу мець у ініцыятыўнай групе зборшчыкаў подпісаў дзьве тысячы чалавек. Як толькі будзе аб’яўлена афіцыйна пра пачатак выбарчай кампаніі (а гэта ў жніўні), адразу рэгіструем ініцыятыўную групу і ідзем далей».

Карэспандэнт: «Дык 7 чэрвеня вас абвесьцяць патэнцыйным кандыдатам на прэзыдэнта?»

Анісім: «Не, пра сваё вылучэньне я буду аб’яўляць пазьней. Гэта будзе асобна і ня ў гэту нядзелю. Але раней, чым афіцыйна аб’явяць пра пачатак выбарчай кампаніі. А 7-га адбудзецца шырокае абмеркаваньне грамадзкасьцю палітычнай сытуацыі ў Беларусі».

У раду Кангрэсу за незалежнасьць уваходзяць таксама Сяргей Антончык, Уладзімер Колас, Алег Трусаў ды іншыя вядомыя асобы. А першыя тры подпісы пад маніфэстам супраць расейскага імпэрыялізму паставілі былы кіраўнік беларускай дзяржавы Мечыслаў Грыб, акадэмік Радзім Гарэцкі і вэтэран Другой сусьветнай вайны Фэлікс Шкірманкоў.

Паказаць камэнтары

XS
SM
MD
LG