Як мы паведамлялі, грамадзкая арганізацыя «Открытая Россия», створаная былым уладальнікам расейскай нафтавай кампаніі ЮКАС Міхаілам Хадаркоўскім, 25 траўня прэзэнтавала фільм «Сям’я» пра жыцьцё ў Чачні пад уладай Рамзана Кадырава.
У фільме, у прыватнасьці, расказваецца пра месца кіраўніка рэспублікі ў сыстэме фэдэральнай улады Расеі, пра створаныя Рамзанам Кадыравым сілавыя структуры (іх у фільме называюць апрычнінай), а таксама пра выкраданьні і катаваньні затрыманых.
У фільме ёсьць інтэрвію людзей, якія так ці інакш сутыкнуліся з парушэньнямі закону з боку чачэнскіх уладаў. Акрамя таго, у фільме гаворыцца, што, акрамя шматмільярдных бюджэтных датацыяў, Кадыраў атрымлівае грошы з дапамогай «складанай сыстэмы даніны». Паводле аўтараў фільму, кожны чачэнец раз на месяц плаціць складкі ў Фонд імя Ахмата Кадырава: работнікі бюджэтнай сфэры нібыта пералічваюць да 10% заробку, супрацоўнікі прыватных кампаніяў — да траціны даходаў, бізнэсоўцы — да паловы.
Фільм «Сям’я» часова заблякаваны на Youtube ў сувязі з прэтэнзіямі на парушэньне аўтарскіх правоў. Скаргу напісаў уладальнік таварыства з абмежаванай адказнасьцю «Т&К Продакшн» Ільяс Сынбулатаў. У якіх менавіта момантах фільма ён угледзеў парушэньне аўтарскіх правоў, у дакумэнце не ўдакладняецца.
"Открытая Россия" заяўляе, што ўсе выкарыстаныя матэрыялы
ўзятыя законна, і апратэстоўвае блякаваньне фільму. Паводле дадзеных праекту, да моманту блякаваньня стужкі пра Кадырава на Youtube паглядзелі больш за 900 тысяч разоў.
Стужку дагэтуль можна паглядзець на інтэрнэт-партале Vimeo:
Між тым пачаўся перасьлед людзей, якія пагадзіліся даць інтэрвію для фільму. 1 чэрвеня ў Чачні звольнілі з працы маці Аліхана Ахмедава — аднаго з тых, хто пагадзіўся распавесьці на камэру пра катаваньні на базе чачэнскага АМАПу. Прычыны звальненьня з працы жанчыне патлумачылі проста: «Усё таму, што твой сын зьняўся ў "Сям’і"».
Ахмедаў — былы супрацоўнік міліцыі. У фільме гаворыцца, што ён быў «жорстка зьбіты на базе чачэнскага АМАПу на асабісты загад аднаклясьніка Кадырава, камандзіра АМАПу Аліхана Цакаева».