Лінкі ўнівэрсальнага доступу

Сьледам за «начнымі ваўкамі» празь Беларусь скачуць казакі


Расейскія казакі салютуюць падчас цырымоніі адкрыцьця бюсту прэзыдэнта Расеі Ўладзімера Пуціна ў Ленінградзкай вобласьці 16 траўня 2015

Расейскія казакі салютуюць падчас цырымоніі адкрыцьця бюсту прэзыдэнта Расеі Ўладзімера Пуціна ў Ленінградзкай вобласьці 16 траўня 2015

У рамках сьвяткаваньня 70-годзьдзя перамогі ў Другой сусьветнай вайне адбываецца конны паход данскіх казакоў па маршруце Масква — Бэрлін.

Пра гэта паведамляе сайт міністэрства культуры Маскоўскай вобласьці.

Акцыя пачалася 30 траўня на Паклоннай гары ў Маскве.

У Нямеччыну накіроўваюцца 18 данскіх казакоў ва ўзросьце ад 15 да 67 гадоў. «Удзел у праекце прымуць таксама выхаванцы Маскоўскага казацкага кадэцкага корпуса імя Шолахава», — гаворыцца ў паведамленьні.

Удзельнікі маршу маюць праехаць па тэрыторыі чатырох дзяржаваў — Расеі, Беларусі, Польшчы і Нямеччыны. Маршрут заплянаваны па шляхах, якімі ішлі кавалерысты Чырвонай Арміі ў 1941-1945 гадах.

«У Беларусі, Польшчы і Нямеччыне да казакоў далучацца мясцовыя коньнікі, якія заявілі пра жаданьне прайсьці разам зь імі частка шляху па тэрыторыі сваіх краінаў. У Бэрлін міжнародная конная каманда павінна прыбыць 12 жніўня» — паведамляе прэсавая служба міністэрства культуры Маскоўскай вобласьці.

Падчас паходу маюць адбыцца «тэматычныя канфэрэнцыі, круглыя сталы, на якіх плянуюцца выступы палітычных і грамадзкіх дзеячаў. У пунктах прыпынкаў будуць арганізаваныя мітынгі памяці, канцэрты, паказальныя выступленьні казакоў па джыгітоўцы і валоданьню халоднай зброяй».

У красавіку-траўні падобны рэйд спрабавалі правесьці расейскія байкеры з клюбу «Начныя ваўкі». Яны без праблем праехалі празь Беларусь, на ўскладаньні «ваўкамі» кветак да «Кургану Славы», прысутнічалі намесьнік кіраўніка адміністрацыі прэзыдэнта РБ Ігар Бузоўскі і прадстаўнікі кіраўніцтва Менску. Польшча, Чэхія, Літва, Фінляндыя і Нямеччына адмовіліся ўпускаць байкераў на сваю тэрыторыю за падтрымку імі анэксіі Крыму і палітыкі Пуціна ва Ўкраіне.

У выніку, байкеры былі вымушаны ў адзіночку прабірацца ў Эўропу, дзе ў суправаджэньні консулаў і паслоў ўскладалі кветкі да помнікаў.

За «страчаную касмэтычку», якую для «начных ваўкоў» да амбасады Расеі ў Менску прынесла актывістка Вольга Нікалайчык, яна атрымала 13 сутак адміністрацыйнага арышту.

Паказаць камэнтары

XS
SM
MD
LG