Пра гэта са спасылкай на расейскае агенцтва РИА Новости піша інтэрнэт-рэсурс «Ежедневник».
Расейскае агенцтва РИА Новости прааналізавала замежныя СМІ на прадмет таго, якім яны малююць вобраз Расеі. Яно спрабавала знайсьці адказы на пытаньні: як ставіцца да Расеі замежная прэса, што ў жыцьці Расеі цікавіць прэсу больш за ўсё, якія грамадзкія дзеячы не сыходзяць з вокладак замежных выданьняў.
Паводле вэрсіі агенцтва, беларускія СМІ пішуць пра Расею ў «памяркоўна нэгатыўнай» танальнасьці. Такая танальнасьць характэрная для большасьці краінаў Заходняй Эўропы.
Прыкметна, што Літва, паводле вэрсіі агенцтва, піша пра Расею лепш, чым Беларусь — у яе танальнасьць нэўтральная. Таксама «нэўтральныя» да Расеі Бэльгія, Нідэрлянды, Партугалія, Італія і паўднёва-эўрапейскія краіны (Балканская паўвыспа). Нэўтральная ў адносінах да сябе і сама Расея, сьцьвярджае РІА Навіны.
Па-за эўрапейскім кантынэнтам большасьць краінаў у сваіх публікацыях нэўтральныя, за выключэньнем ЗША, Японіі і некаторых іншых.
Горш за ўсё вобраз Расіі падаюць тры краіны — Украіна, Швэцыя і Калюмбія.
Краінаў, якія б прадстаўлялі вобраз Расіі «пазытыўна», наогул не існуе. «Памяркоўна пазытыўна» пішуць толькі дзьве краіны — Сырыя і Кіргізстан.
