Лінкі ўнівэрсальнага доступу

Сыны Лукашэнкі зноў будуць кіраваць Прэзыдэнцкім спартовым клюбам


Старшынёй цэнтральнай рады Прэзыдэнцкага спартовага клюбу 27 траўня пераабраны Дзьмітры Лукашэнка.

Пра гэта паведамляе сайт sportclub.by па выніках агульнага сходу аб’яднаньня.

Дзьмітры Лукашэнка кіруе клюбам ад моманту яго заснаваньня ў 2005 годзе.

У цэнтральную раду клюба зноў увайшоў яшчэ адзін сын Лукашэнкі — Віктар. Ён зьяўляецца памочнікам прэзыдэнта па пытаньнях нацыянальнай бясьпекі.

Сярод іншых у складзе рады бізнэсовец Юры Чыж і мэр Менску Андрэй Шорац.

Спартовы аглядальнік Барыс Тасман сказаў карэспандэнту Свабоды, што клюб фінансуе маладых таленавітых спартоўцаў і трэнэраў:

«Спачатку гэта была невялікая група, а цяпер некалькі соцень чалавек. Адкуль бяруцца грошы ў Прэзыдэнцкага спартовага клюбу, я ня ведаю. Клюб — гэта структура, паралельная Міністэрству спорту. Але ж у нас у краіне многа паралельных структур і ня толькі ў спорце. Мы ўжо да гэтага прызвычаіліся. Ну, а калі гэта прэзыдэнцкі спартовы клюб, то няма нічога дзіўнага, што сын прэзыдэнта кіруе гэтым клюбам. Нас проста прывучылі за гэтыя 20 гадоў да такіх рэчаў, якія, напрыклад, у іншых краінах немагчымыя. Ну, калі гэта „прэзыдэнцкі“, то сямейнасьць цалкам зразумелая. У нас жа прэзыдэнт займаецца спортам».

Раней Дзьмітры Лукашэнка апавядаў, што клюб не прыцягвае бюджэтныя сродкі для сваёй дзейнасьці, а існуе за кошт сяброўскіх унёскаў, спонсарскай падтрымкі і ўласнай гаспадарчай дзейнасьці.

Дзьмітры Лукашэнка — сярэдні сын кіраўніка краіны.

XS
SM
MD
LG