Мужчына, які застрэліў двух чалавек і ўзяў у закладнікі трох супрацоўнікаў на аўтазапраўцы каля пасёлку Кароціч Харкаўскай вобласьці, забіты, паведаміў старшыня Харкаўскай абласной дзяржадміністрацыі Ігар Райнін.
«Злачынца зьнішчаны. Усе закладнікі жывыя і здаровыя. Сытуацыя ўскладнялася тым, што ўсё адбывалася на бэнзазапраўках», — паведаміў Райнін журналістам каля месца здарэньня ў панядзелак увечары.
Журналіст Радыё Свабода, які прысутнічае на месцы здарэньня распавядае, што каля 20.30 было чуць некалькі стрэлаў. Пасьля гэтага ў напрамку АЗС пабеглі людзі ў камуфляжы і са зброяй. Затым на месца пад’ехалі некалькі аўтамабіляў хуткай дапамогі і пажарныя.
Карэспандэнт Радыё Свабода паведамляе з месца падзеі, што на 21.25 аўтазапраўка аточаная сілавікамі, на месцы працуюць экспэрты.
Сёньня, 25 траўня, у Харкаўскім абласным упраўленьні МУС Ўкраіны паведамілі, што невядомы абстраляў людзей, забіўшы дваіх чалавек, пасьля чаго на АЗС захапіў закладнікаў. Паводле зьвестак міліцыі, «высьветлена, што злачынцам зьяўляецца 48-гадовы мясцовы жыхар».
Партал gordonua.com паведамляў, што злачынца патрабаваў даць яму калідор на тэрыторыю, пад кантролем сэпаратыстаў.