У справе аб забойстве Барыса Нямцова зьявіўся новы фігурант. Гэта жыхар Чачні Руслан Мухадзінаў, паведамляе «Коммерсант».
Сьледзтву трэба будзе высьветліць, ці зьяўляўся Руслан Мухадзінаў тым самым «Русікам», пра якога казаў у першапачатковых паказаньнях галоўны абвінавачаны па справе Заур Дадаеў. Для гэтага яны плянуюць прадэманстраваць фатаграфію Мухадзінава на апазнаньне іншаму арыштаванаму па справе — Тамерлану Эскерханаву. Калі апошні пацьвердзіць здагадку сьледзтва, то ў якасьці заказчыка забойства Барыса Нямцова будуць разглядаць ужо не маёра Руслана Герамеева, адзначае «Коммерсант». Раней сьледзтва лічыла «Русікам» прадстаўніка аўтарытэтнай чачэнскай сям’і Руслана Герамеева.
Адшукаць і дапытаць самога Мухадзінава сьледзтву пакуль не ўдалося. Тым ня менш, супрацоўнікі праваахоўных органаў Чачні дапыталі яго сваякоў, у прыватнасьці, цікавіліся, ці абмяркоўваліся ў сям’і публікацыі карыкатур у францускім часопісе Charlie Hebdo. Сьледзтва таксама высьветліла, што Мухадзінаў карыстаўся ў Маскве аўтамабілем Mercedes ML. Паводле паказаньняў Эскерханава, менавіта на такім аўтамабілі перасоўваўся меркаваны заказчык забойства.
Згодна з раньнімі паказаньнямі Заура Дадаева, чалавек, якога завуць «Русік», даў яму і іншым меркаваным удзельнікам забойства апазыцыйнага палітыка аўтамабіль, пісталет і патроны, паабяцаўшы 25 мільёнаў рублёў за ліквідацыю Барыса Нямцова. Прычына, паводле слоў Дадаева, у тым, што Нямцоў падтрымаў публікацыю карыкатур на прарока Мухамеда. Пасьля Дадаеў адмовіўся ад дадзеных паказаньняў, заявіўшы, што даў іх пад катаваньнямі.
Барыс Нямцоў быў забіты позна ўвечары 27 лютага ў цэнтры Масквы.