Лінкі ўнівэрсальнага доступу

Vox-pop: У нас ёсьць свая краіна, свая мова, то няхай слухаюць нашу беларускую мову


«Ці спрыяе ўдзел у Эўравізіі выхаваньню патрыятычных пачуцьцяў беларусаў? Ці турбуе вас тое, на якой мове сьпяваюць на гэтым конкурсе прадстаўнікі Беларусі?» — спыталіся мы ў мінакоў на менскіх вуліцах.

Юнак: Эўрабачаньне? Хутчэй за ўсё — так. Гэта іміджавая рэч, і калі вы выходзіце на міжнародную арэну, то — так, вы павінны сьпяваць па-беларуску. Людзі павінны ведаць, што ёсьць такая беларуская мова. Бо некаторыя прыяжджаюць у Беларусь, глядзяць на шыльды і кажуць: у вас ёсьць свая мова? Гэта няправільна. Пытаньне мовы, безумоўна, хвалюе, бо яна паступова зьнікае ў Беларусі. Некаторыя мае сябры, і я таксама, размаўляем па-беларуску паміж сабой. А хацелася б чуць беларускую мову і на радыё, і на тэлебачаньні. Але файна тое, што ў мэдыях пачынаюць працаваць кампаніі, якія працуюць па-беларуску, і гэта крута.

Юначка: Я думаю, што мова — гэта важна. Я сама з Расейскай Фэдэрацыі, але бачу, што вы хочаце захаваць сваю мову. Я лічу, што гэта вельмі важна хоць бы таму, што беларуская мова вельмі прыгожая.

Спадар сталага веку: Канечне мне прыемна, калі на беларускай мове размаўляюць. Бо і сам я беларус, мянчук. І калі б на Эўрабачаньні сьпявалі па-беларуску, то гэта, канечне ж, дапамагло б беларускай мове. Гэта ж прэстыж нашай дзяржавы, нашай мовы. Мы тут, у Беларусі, усе павінны размаўляць па-беларуску. Але ж не атрымліваецца. Як узяць, да прыкладу, мяне, то я вырас пры Савецкім Саюзе. Што мы тады ведалі? Так, на трасянцы размаўлялі: і па-расейску, і па-беларуску. А як пагляджу які спэктакль па-беларуску ці кіно якое — то прыемна, добра прыемна.

Спадарыня сталага веку: Я думаю, што спрыяе, бо ўсе мы хвалюемся за нашых выканаўцаў. А на якой мове сьпяваць — я думаю, што ня важна. Важна, каб разумелі ўсе. Таму лепш па-ангельску.

Юнак: Я думаю, вельмі важна, каб нашы ўдзельнікі сьпявалі па-беларуску. Каб сьпявалі на беларускай мове, то гэта было бы здорава. Бо патрыятызм — гэта важна. Гэта выдзяляла б нашу краіну сярод іншых.

Юначка: Мне падаецца, што ў гэтым выпадку патрыятызм у іншым — што мы хварэем за сваіх артыстаў. А на якой мове яны сьпяваюць на эўрапейскім конкурсе, то тут я не лічу важным, каб абавязкова была беларуская мова. Уласныя конкурсы, то так — адназначна. А на міжнародных — я, магчыма, і згодная з ангельскай мовай.

Спадар сярэдніх гадоў: Канечне, важная беларуская мова. А то ўсё расейская і расейская. Я вось таксама размаўляю па-расейску, то я інжынэр-энэргетык, уся літаратура, дакумэнтацыя, усе прадметы для навучаньня былі па-расейску. А важна ж не забываць сваю мову.

Спадарыня сярэдніх гадоў: Я ўвогуле лічу, што для гэтага конкурсу ня трэба асаблівага таленту. І ў мінулыя гады лепшыя выканаўцы з добрымі галасамі не перамагалі — ён ня дужа прэстыжны. Але трэба ўдзельнічаць, як і ўсім краінам, каб паказаць, што ў нас ёсьць годныя выканаўцы. А што да мовы, то канечне, мне таксама не падабаецца, што вось гэтая нашая студэнтка сьпявала на замежнай мове. Трэба на сваёй мове сьпяваць. Бо ёсьць жа наша краіна, ёсьць наша мова. Дык няхай усе слухаюць нашу беларускую мову.

Спадар сярэдніх гадоў: Я думаю важна, каб сьпявалі на беларускай мове, бо гэта ж наша родная мова. На жаль, у нас такая завядзёнка, што большасьць насельніцтва размаўляе па-расейску, у тым ліку і я. Але я быў бы ня супраць гэтую сытуацыю зьмяніць.

XS
SM
MD
LG