Лінкі ўнівэрсальнага доступу

Ужо сёньня, 14 траўня: 20 гадоў рэфэрэндуму, паседжаньне ЦВК і хакей Беларусь-Канада


Падзеі і даты сёньняшняга дня ў Беларусі, сьвеце, гісторыі.

У Доме ўраду адбудзецца пасяджэньне ЦВК, прысьвечанае, як паведамляецца, «некаторым пытаньням падрыхтоўкі выбараў прэзыдэнта Рэспублікі Беларусь у 2015 годзе». Ня выключана, што можа быць названая дата выбараў.

У менскім офісе руху «За Свабоду» (праспэкт Незалежнасьці, 80-73) пройдзе дыскусія пра тое, якім павінен быць Беларускі нацыянальны ўнівэрсытэт. Пачатак у 18:00.

На Плошчы Якуба Коласа ў Менску адкрыецца выставачны праект «Мастак і горад», сёлета ён прысьвечаны мастаку Мікалаю Селешчуку. Пачатак а 18-й.

У Жыровічах адкрыецца двухдзённая міжнародная канфэрэнцыя «Сьвяты князь Уладзімір і хрышчэньне Русі». Паслухаць духоўную праграму міжнароднага фэстывалю студэнцкіх хораў «Папараць-кветка» можна будзе у Архікатэдральным саборы у Менску (Пл. Свабоды, 9, пачатак у 19:30).

У Празе у чвэрцьфінале чэмпіянату сьвету па хакеі сустрэнуцца каманды Беларусі і Канады (О2 арэна, 16:15).

ДЗЕНЬ У ГІСТОРЫІ

1613 — мястэчка Жыровічы атрымала магдэбурскае права.

1874 — у Менску пачаў дзейнічаць першы фантан, упрыгожаны скульптурнай кампазыцыяй «Хлопчык зь лебедзем».

1917 — у Менску створанае Першае таварыства беларускай драмы і камэдыі, якое заснавалі Фларыян Ждановіч і Ігнат Буйніцкі.

1948 — абвешчаная незалежнасьць дзяржавы Ізраіль.

1954 — у Гаазе дзяржавы-сябры ААН падпісалі «Канвэнцыю аб абароне культурных каштоўнасьцяў у выпадку ўзброенага канфлікту».

1955 — у Варшаве падпісалі дэклярацыю аб стварэньні Арганізацыі Вайсковай дамовы. Так званая Варшаўская дамова краінаў сацлягеру існавала да 1 ліпеня 1991 году.

1988 — пачаўся вывад савецкіх войскаў з Аўганістану.

1995 — у Беларусі прайшоў рэфэрэндум у пытаньнях дзяржаўнасьці расейскай мовы, дзяржаўных сымбаляў, эканамічнай інтэграцыі з Расеяй і права прэзыдэнта распускаць парлямэнт. У выніку рэфэрэндуму краіна зьмяніла дзяржаўную сымболіку часоў адноўленай незалежнасьці — герб «Пагоня» і бел-чырвона-белы сьцяг на падпраўленыя савецкія сымбалі.

2011 — Былы кандыдат у прэзыдэнты Андрэй Саньнікаў асуджаны на 5 гадоў зьняволеньня.

У гэты дзень нарадзіліся:

1814 — Каэтан Касовіч, беларускі і расейскі навуковец-усходазнаўца, першы вучоны санскрытоляг у Расеі.

1869 — Янкель Кругер, беларускі жывапісец і пэдагог, заслужаны дзяяч мастацтваў Беларусі.

1899 — Тодар Куніцкі, лекар, адзін з заснавальнікаў Беларускага Студэнцкага Саюзу ў Вільні і Беларускага Сялянскага Саюзу.

1907 — Язэп Жыновіч, музыка-цымбаліст, дырыжор, кампазытар і пэдагог, народны артыст БССР і СССР, прафэсар, ляўрэат Дзяржаўнай прэміі БССР.


У гэты дзень памерлі:

1610 — Генры IV, кароль Францыі.

1873 — Міхаіл Дзьмітрыеў, дырэктар Наваградзкай гімназіі.

1939 — Павал Жаўрыд, дзяяч нацыянальна-вызваленчага руху, адзін з кіраўнікоў Слуцкага паўстаньня.

1998 — Фрэнк Сінатра, амэрыканскі сьпявак, актор і шоўмэн.

ЦЫТАТА НА ПАМЯЦЬ

Гвалтоўным чынам сымболіку не мяняюць. Зьмены пад прымусам грамадзтва калі і прымае, то доўга памятае пра гэты прымус. Менавіта гэта паказаў рэфэрэндум 1995 году. У гісторыі Беларусі пытаньне дэмакратыі і пытаньне нацыянальнай сымболікі зьвязаныя паміж сабой. Вяртаньне да яго адбудзецца тады, калі пачнуцца перамены. Перакананы, што дэмакратычная дзяржава не можа выступаць пад камуністычнымі сымбалямі, сымбалямі, зьвязанымі з палітыкай прымусу адносна гэтай дзяржавы і яе грамадзян.

Валянцін Голубеў, дэпутат Вярхоўнага Савету 12-га скліканьня.

XS
SM
MD
LG