Лінкі ўнівэрсальнага доступу

14 друкарняў адмовіліся друкаваць даклад Нямцова «Пуцін. Вайна»


Адмову тлумачылі зьместам дакладу і сытуацыяй у краіне. Даклад «Пуцін. Вайна» быў выдадзены мінімальным накладам (3000 асобнікаў) адной друкарняй на ўмовах ананімнасьці.

14 друкарняў адмовіліся друкаваць даклад Барыса Нямцова «Пуцін. Вайна» аб прысутнасьці расейскіх войскаў ва Ўкраіне. Пагадзілася толькі адна друкарня, і тое на ўмовах ананімнасьці. Адмову тлумачылі зьместам дакладу і сытуацыяй у краіне.

Як распавёў Усевалад Чагаеў, які займаўся публікацыяй дакладу, сярод тых друкарняў, што адмовіліся, былі тыя, якія раней друкавалі іншыя даклады Нямцова і выконвалі заказы Фонду барацьбы з карупцыяй Аляксея Навальнага. Паводле мэнэджара адной зь іх, пасьля публікацыі папярэдняга дакладу апазыцыйнага палітыка, друкарню правярала падатковая служба і абшуквала паліцыя.

Даклад «Пуцін. Вайна» быў надрукаваны мінімальным накладам (3000 асобнікаў) за некалькі дзён да яго прэзэнтацыі друкарняй, якая пагадзілася зрабіць гэта без дамовы і на ўмовах ананімнасьці.

Паплечнікі Барыса Нямцова не выключаюць, што ўлады і далей будуць перашкаджаць распаўсюджваньню дакладу. У аўторак, пасьля яго публікацыі на сайце putin-itogi.ru, сайт быў падвергнуты хакерскаму нападу. Аднак, нягледзячы на ціск уладаў, ужо заплянаваныя прэзэнтацыі дакладу ў расейскіх рэгіёнах і пачаты збор сродкаў на яго выданьне празь сыстэму «Яндэкс-кашалёк».

Барыс Нямцоў не пасьпеў скончыць даклад «Пуцін. Вайна» аб удзеле расейскіх вайскоўцаў у канфлікце на ўсходзе Украіны. Пасьля яго забойства працу над дакумэнтам завяршылі яго паплечнікі. Сярод вэрсій матываў для забойства калегі і сябры Нямцова называюць працу над гэтым дасьледаваньнем. 12 траўня ў Маскве ў офісе партыі РПР-ПАРНАС адбылася прэзэнтацыя дакладу.

Паказаць камэнтары

XS
SM
MD
LG