Лінкі ўнівэрсальнага доступу

Страляніна падчас канфэрэнцыі па карыкатурах на прарока Мухамада


Паліцыянт каля школьнага аўтобуса, гатовага да эвакуацыі ўдзельнікаў канфэрэнцыі.

Паліцыянт каля школьнага аўтобуса, гатовага да эвакуацыі ўдзельнікаў канфэрэнцыі.

Дваіх нападнікаў забілі блізу амэрыканскага гораду Далас у штаце Тэксас, дзе праходзіла канфэрэнцыя, прысьвечаная карыкатурам на прарока Мухамада.

Напад адбыўся ў Гарлэндзе напярэдадні. Быў паранены ахоўнік. Улады адзначаюць, што раненьне не ўяўляе небясьпекі для ягонага жыцьця. Агнём у адказ паліцыянты забілі нападнікаў. У паліцыі адзначаюць, што пакуль не вядома, ці зьвязаная страляніна з дыскусіяй пра карыкатуры на ісламскага прарока. Пра якія-небудзь сур’ёзныя пагрозы напярэдадні канфэрэнцыі не паведамлялася.

Мерапрыемства праводзіла арганізацыя American Freedom Defense Initiative, таксама вядомая пад назвай «Спыніць ісламізацыю Амэрыкі». Гэтая арганізацыя, у прыватнасьці, агітуе супраць будаўніцтва ісламскага цэнтру побач з Сусьветным гандлёвым цэнтрам у Нью-Ёрку.

Сярод удзельнікаў канфэрэнцыі ў Гарлэндзе быў нідэрляндзкі палітык Герт Вілдэрс, вядомы сваімі выказваньнямі супраць мусульман.

Зьяўленьне карыкатур на прарока Мухамада ў эўрапейскіх выданьнях выклікала гнеў і пагрозы з боку радыкальных ісламістаў. У студзені група экстрэмістаў напала на рэдакцыю францускага часопіса Charlie Hebdo, загінулі 12 чалавек.

XS
SM
MD
LG