Фота дня:
Новае фота кожны дзень, увесь год. Прысылайце сюды свае здымкі гарадзкіх і прыродных краявідаў, падзеяў і зьяваў жыцьця ў 2015 альбо на пошту radiosvaboda@gmail.com. Пажадана дасылаць фота ў прапорцыі 16 на 9. Усе аўтары фота, апублікаваных на сайце Свабоды, атрымаюць прызы. Тры найбольш папулярныя здымкі месяца будуць адзначаныя асобна.
Афіша:
У беларускай сталіцы ў розных месцах (у прыватнасьці, на плошчы Незалежнасьці і ў парку Перамогі) адбудуцца мерапрыемствы, прысьвечаныя адзначэньню Сьвята працы.
У Нацыянальным гістарычным музэі адкрыецца выстава скульптуры, керамікі і графікі двух вялікіх гішпанскіх мастакоў – Сальвадора Далі і Пабла Пікаса.
У «Менск-Арэне» пачынаецца трохдзённы чэмпіянат Эўропы па мастацкай гімнастыцы. Пачатак спаборніцтваў а 10.00.
На Чырвонай плошчы ў Тураве, ад 11.00 да 14.00, пройдзе «Фэстываль кулікоў», у рамках якога адбудуцца канцэрт гурту «Vuraj», творчыя майстэрні, кірмаш рамёстваў ды іншыя захады.
У базе адпачынку «Купалінка» каля Горадні пачнецца штогадовы двухдзённы байк-фэстываль «Хавайся ў бульбу».
У Вільні пачынаецца двухдзённы фэстываль «Беларуская вясна ў Вільні».
У гісторыі:
1576 – Стэфан Баторы стаў каралём Рэчы Паспалітай.
1915 – нарадзіўся Іван Любачка, беларускі настаўнік, гісторык, дзяяч эміграцыі ў Нямеччыне і ЗША.
1931 – нарадзіўся Алесь Салавей, беларускі паэт.
1931 – нарадзіўся Алег Лойка, беларускі паэт, крытык і перакладнік.
1945 – над Рэйхстагам вывешаны чырвоны сьцяг Перамогі.
1951 – выйшла ў эфір першая перадача Радыё Свабода (Радыё «Вызваленьне») зь Мюнхэну.
2004 – да Эўрапейскага Зьвязу далучыліся 10 новых краінаў: Вугоршчына, Кіпр, Латвія, Літва, Мальта, Польшча, Славаччына, Славенія, Чэская Рэспубліка, Эстонія.
У памяці:
1986 – памёр Сьцяпан Александровіч, беларускі літаратуразнаўца, доктар філялягічных навук.
Цытата:
«Заўсёды трошкі таямніцай
Была ты для мяне і ёсьць:
Чагосьці сьветлага крыніцай,
Перад якім я – толькі госьць.
Прывабнай зоркай зь яркай высі
Сышла ў мае сямнаццаць год.
Узяць пад ручку баючыся,
Цябе праводзіў да варот.
Ты мне і сёньня – таямніца,
І, можа, шчасьце ў тым і ёсьць,
Каб не напіцца з той крыніцы,
Перад якой ты – вечны госьць!»
Алег Лойка
