У Маскве зьдзейсьнены напад на народны мэмарыял на месцы забойства палітыка Барыса Нямцова. З Вялікага Маскварэцкага маста ў суботу раніцай былі вывезеныя ўсе кветкі, сьвечкі і плякаты.
Адказнасьць за пагром узялі на сябе сябры радыкальнай групоўкі «Рускі вызваленчы рух SERB». Праз некалькі гадзін пасьля пагрому мэмарыял быў адноўлены.
Пагромы на месцы забойства Барыса Нямцова актывісты SERB ладзілі ўжо некалькі разоў. Кветкі і сьвечкі з народнага мэмарыяла вывозілі і камунальныя службы Масквы. Прэзыдэнт Расеі Ўладзімер Пуцін падчас «Прамой лініі» 16 красавіка выказаўся супраць зьнішчэньня мэмарыяла памяці Нямцова.
