Начальнік Генэральнага штабу Ўзброеных сілаў Чэхіі Пэтр Павел заявіў у інтэрвію Associated Press, што Паўночнаатлянтычны саюз павінен быць гатовы да «нетрадыцыйных мэтадаў» вядзеньня вайны, павялічыць выдаткі на абарону, праводзіць больш сумесных вучэньняў і заняць «цьвёрдую пазыцыю» на фоне дзеяньняў Расеі.
Генэрал Пэтр Павел, які ў найбліжэйшай будучыні зойме пасаду ў кіраўніцтве НАТО, заявіў, што заходнія саюзьнікі былі засьпетыя зьнянацку дзеяньнямі Масквы ва Ўкраіне. Таму, лічыць Павел, альянс павінен пераканаць грамадзкасьць, што заходнія краіны валодаюць сродкамі і праяўляюць гатоўнасьць для супрацьстаяньня Расеі.
Будучы дарадца кіраўніка НАТО (гэтую пасаду Пэтр Павел зойме ў чэрвені) адзначыў таксама эфэктыўнасць расейскіх мэтадаў вядзеньня інфармацыйнай і псыхалягічнай вайны як на тэрыторыі Расеі, так і за мяжой.
