Галоўная сьледчая ўправа Генэральнай пракуратуры Ўкраіны ўнесла ў Адзіны рэестар дасудовых расьсьледаваньняў факт крадзяжу каштоўнасьцяў з рэзыдэнцыі «Межыгор’е», у тым ліку славутага «залатога батона».
Пра гэта ў Facebook напісаў народны дэпутат фракцыі «Блок Пятра Парашэнкі» Зьміцер Дабрадомаў.
«Нарэшце праваахоўнікі адрэагавалі на факты зьнікненьня каштоўнасьцяў з Межыгор’я, у прыватнасьці, легендарнага „залатога батона Януковіча“», — паведаміў дэпутат.
«Мяне абурае, што да апублікаваньня мною фактаў гэтых крадзяжоў нікому з МУС і Генпракуратуры не было справы да каштоўнасьцяў цаною ў некалькі мільёнаў даляраў, якія павінны быць далучаныя ў якасьці рэчавых доказаў да карупцыйных крымінальных справаў супраць кіраўнікоў мінулага рэжыму!» — дадаў Дабрадомаў.
Як падае агенцтва УНІАН, раней байцы Нацыянальнай гвардыі Украіны затрымалі грамадзяніна Расеі, які спрабаваў пракрасьціся на тэрыторыю рэзыдэнцыі «Межыгор’е» ў Кіеўскай вобласьці. Падчас затрыманьня мужчына спрабаваў аказаць супраціў ваенным.