Лінкі ўнівэрсальнага доступу

За адмову прыбіраць могілкі дармаедаў чакае карцэр


За нявыплату або няпоўную выплату збору «дармаедаў» будуць караць штрафам ад двух да чатырох базавых велічыняў (базавая велічыня цяпер складае 180 тысяч рублёў) або адміністрацыйным арыштам да 15 сутак.

Асобы, у дачыненьні да якіх будзе прыменена адміністрацыйнае спагнаньне ў выглядзе арышту, цягам тэрміну пакараньня будуць прыцягвацца да грамадзка карысных работ.

«Гэта праца без аплаты, для выкананьня якой не патрабуецца пэўных прафэсійных ведаў і навыкаў, кваліфікацыі, якая мае сацыяльна карысную значнасьць для адміністрацыйна-тэрытарыяльнай адзінкі. Напрыклад, прыборка вуліц, могілак, іншых аб’ектаў сацыяльнага прызначэньня, збор камянёў на палях і так далей», — апавёў начальнік Дэпартамэнту грамадзянства і міграцыі Міністэрства ўнутраных спраў Аляксей Бягун падчас анлайн-канфэрэнцыі на сайце Міністэрства працы.

«Пералік аб’ектаў, на якіх будуць выконвацца грамадзка карысныя працы, канкрэтныя віды такіх работ будуць вызначацца рашэньнямі мясцовых выканаўчых і распарадчых органаў», — растлумачыў ён.

Дармаедаў, якія будуць адмаўляцца ад грамадзка карысных работ падчас арышту будуць караць дысцыплінарнымі спагнаньнямі.

Паводле Бегуна, цяпер Працэсуальна-выканаўчы кодэкс аб адміністрацыйных правапарушэньнях прадугледжвае наступныя віды дысцыплінарных спагнаньняў: вымова, пазачарговае дзяжурства па прыборцы памяшканьняў, карцэр або ўтрыманьне ў адзіночнай камэры.

Пытаньні максымальнай штодзённай працягласьці працаў, забесьпячэньня інструмэнтам ды іншыя неўзабаве час будуць урэгуляваны ўрадавай пастановай.

Паведамленьні пра выплату збору падаткавыя органы ўручаць выплатнікам да 1 кастрычніка 2016 году. Заплаціць яго трэба будзе да 15 лістапада.

Паводле новага дэкрэту прэзыдэнта, асобы, якія працавалі менш за 183 дні, павінны заплаціць збор у суме 20 базавых велічыняў (3 мільёны 600 тысяч рублёў).

XS
SM
MD
LG