У кіеўскім аэрапорце тэхніку сустракаў прэзыдэнт Украіны Пятро Парашэнка. Ён прызнаў, што ўкраінскай арміі вельмі неабходная сучасная зброя і тэхніка. Ўзбройвацца падахвочваюць дзеяньні агрэсара, Расейскай Фэдэрацыі, якая не выконвае дамоўленасьці па палітычным урэгуляваньні канфлікту на ўсходзе Ўкраіны.
Самалётам ваенна-паветраных сілаў ЗША ва Ўкраіну даставілі першыя дзесяць аўтамабіляў Humvee. Шматтонныя машыны з узмоцненай бранёй пасьля ўстаноўкі ўзбраеньня паступяць на ўсход краіны — у дэсантныя часткі і спэцпадразьдзяленьні СБУ, паведамляе Голас Амэрыкі.
Дэсантнік Дзяніс Кохан на такім браневіку езьдзіць ужо цягам двух гадоў і пасьпеў ацаніць перавагі тэхнікі. Ён адзначае, што ўкраінскія аналягі «Кугуар» і «Спартан» — новыя распрацоўкі, таму маюць патрэбу ва ўдасканаленьні. Амэрыканскія браневікі ўжо правераныя часам, у тым ліку і ў баявых дзеяньнях у Іраку і Аўганістане.
«Па праходнасьці ён лепшы за нашу тэхніку, браня моцная — добра вытрымлівае кулі і аскепкі. І мала ў нас такіх машын».
Прэзыдэнт Украіны Пятро Парашэнка не хаваў, што ўкраінская армія вельмі мае патрэбу ў сучаснай тэхніцы. На ўсходзе ўжо выкарыстоўваюцца прадстаўленыя ЗША сродкі лічбавай абароннай сувязі, радары контрабатарэйнай барацьбы, прыборы начнога бачаньня, рабатызаваныя сыстэмы разьмінаваньня, а таксама мэдычнае абсталяваньне.
«Мы цьвёрда трымаем курс на палітыка-дыпляматычнае ўрэгуляваньне міждзяржаўнага канфлікту на Данбасе. Але праціўнік сталымі парушэньнямі рэжыму спыненьня агню падахвочвае нас да актывізацыі нашых намаганьняў па ўмацаваньні абароназдольнасьці. Айчынны ВПК практычна з колаў у тры зьмены працуе над забесьпячэньнем узброеных сілаў Украіны. Аднак нашы рэсурсы застаюцца пакуль абмежаванымі. Таму ваенна-тэхнічная дапамога, якую аказваюць Украіне Злучаныя Штаты Амэрыкі, іншыя краіны, зьяўляецца своечасовай і вельмі неабходнай», — заявіў Пятро Парашэнка.
Астатнія з 230 браневікоў ды іншую тэхніку амэрыканскія ваенныя даставяць ва Ўкраіну цягам 45 дзён.
«Голас Амэрыкі» цытуе вайскоўца ЗША Джона Хардзі:
«Для мяне вялікі гонар даставіць гэтую тэхніку. Спадзяюся, яна ўзмоцніць украінскую армію, і гэтая дапамога будзе спрыяць разьвіцьцю партнэрскіх адносінаў паміж Украінай і ЗША».
Аглядальнікі адзначаюць, што пакуль уся тэхніка, якую амэрыканцы далі Ўкраіне, прызначаная толькі для абароны. Адміністрацыя Абамы ўстрымліваецца прадстаўляць высокадакладную сьмяротную зброю.