Лінкі ўнівэрсальнага доступу

У Маскве разьвіталіся з Барысам Нямцовым НОВЫЯ ВІДЭА


У Маскве прайшла цырымонія разьвітаньня з апазыцыйным палітыкам Барысам Нямцовым, забітым у ноч на 28 лютага ў цэнтры Масквы.

Журналіст Уладзімір Кара-Мурза малодшы, выступаючы на грамадзянскай паніхідзе, заявіў, што Нямцоў «аддаў сваё жыцьцё, каб Расея была нармальнай, свабоднай, квітнеючай» краінай.

Чарга ахвотных разьвітацца з Барысам Нямцовым расьцягнулася на кілямэтар. Тысячы людзей прыйшлі да Сахараўскага цэнтру ў Маскве, дзе праходзіла жалобная цырымонія.

На грамадзянскай паніхідзе выступілі амбасадары Эўразьвязу і ЗША, старшыня праўленьня «Роснано» Анатоль Чубайс, сустаршыня партыі РПР-ПАРНАС і паплечнік Нямцова, Міхаіл Касьянаў, лідэр партыі «Яблык» Рыгор Яўлінскі. Разьвітацца зь Нямцовым прыйшлі таксама віцэ-прэм’ер ураду Аркадзь Дварковіч і кіраўнік апарату ўраду Сяргей Прыходзька, экс-старшыня Цэнтральнага банка Сяргей Дубінін, былы міністар фінансаў Аляксей Кудрын, экс-паплечніца Нямцова па «Саюзе правых сіл» Ірына Хакамада, прадпрымальнікі Міхаіл Фрыдман, Пётр Авэн. Прысутнічае былы прэм’ер-міністар Вялікабрытаніі Джон Мейджор.

Усе выступоўцы на жалобнай цырымоніі адзначалі, што Нямцоў быў вельмі адважным палітыкам, які змагаўся і пацярпеў за свае перакананьні. Прыхільнікі забітага апазыцыянера заклікалі да празрыстага расьсьледаваньня злачынства.

Грамадзянская паніхіда па Барысу Нямцову праходзіць у Сахараўскім цэнтры ў Маскве. Разьвітацца з Нямцовым прыйшлі старшыня праўленьня «Раснана» Анатоль Чубайс, кіраўнік «Расатама» Сяргей Кірыенка, былы міністар фінансаў Аляксей Кудрын, былы віцэ-прэм’ер Алег Сысуеў, дэпутаты Дзярждумы Дзьмітрый Гудкоў, Аляксандр Юшчанка і Аляксей Карніенка. На цырымоніі прысутнічаюць амбасадары ўсіх краін Эўразьвязу і амбасадар ЗША Джон Тэфт.

Ня прымае ўдзел у жалобных цырымоніях апазыцыйны палітык Аляксей Навальны, які цяпер адбывае 15-сутачны адміністрацыйны арышт.

Як паведаміла агенцтва РБК са спасылку на крыніцу ў адміністрацыі прэзыдэнта Расеі, Уладзімер Пуцін накіруе на трызну свайго прадстаўніка ў Дзярждуме Гары Мінха.

Сёньня ж на Траякураўскіх могілках Масквы адбылося адпяваньне і пахаваньне Барыса Нямцова.

Сустаршыня расейскай апазыцыйнай партыі РПР-ПАРНАС, дэпутат Яраслаўскай абласной думы Барыс Нямцоў быў застрэлены невядомым у цэнтры Масквы, на Вялікім Маскварэцкім мосьце ўвечары 27 лютага.

Сьледчы камітэт Расеі лічыць, што прычынамі забойства маглі быць: палітычная правакацыя, помста экстрэмістаў «, украінскі сьлед», асабістая непрыязнасьць.

Паплечнікі Нямцова ўпэўненыя, што забойства было палітычным.

Двух эўрапейскіх палітыкаў, якія зьбіраліся прыбыць у Маскву на пахаваньне забітага апазыцыйнага лідэра Барыса Нямцова, не ўпусьцілі ў Расею.

Па паведамленьні агенцтва BNS, дэпутату Эўрапейскага парлямэнта ад Латвіі Сандры Калніеце ў панядзелак у маскоўскім аэрапорце Шарамецьева было адмоўлена ва ўезьдзе ў Расею.

Латвійскі консул зьвязаўся з расейскім консулам у аэрапорце. Латвійскае консульства атрымала тлумачэньне, што Калніеце пасадзяць на наступны рэйс назад, паколькі яе знаходжаньне ў Расіі зьяўляецца непажаданым.

Таксама паведамляецца, што сьпікер верхняй палаты парлямэнту Польшчы Богдан Барусевіч заявіў, што ўлады Расеі не дазволілі яму прыбыць на тэрыторыю Расеі для ўдзелу ў пахаваньні Барыса Нямцова.

«Інтэрфакс» прыводзіць словы Барусевіча: «Я хацеў аддаць даніну павагі забітаму Барысу Нямцову і ўсім расейцам, якія думаюць гэтак жа, як ён. Але я толькі што даведаўся, што расейскія ўлады не дазволяць мне прысутнічаць на пахаваньні ў Маскве».

Паведамляецца, што адмова выкліканы расейскімі контрсанкцыямі — Барусевіч знаходзіцца ў сьпісе асоб, якім забаронены ўезд на тэрыторыю РФ.

Паказаць камэнтары

XS
SM
MD
LG