Прэзыдэнт Пятро Парашэнка лічыць, што Ўкраінцы змогуць выстаяць і захаваць дзяржаву толькі «пры ўмове, што мы захаваем адзінства, калі мы пазьбегнем любых унутраных сварак, калі любая пятая калёна ня дасьць нам раскалоць нашае адзінства».
«І я ўпэўнены, што менавіта так і будзе. Мы гэта прадэманстравалі на фронце і цяпер ніяк не дамо, не дапусьцім унутранага фронту, над адкрыцьцём якога вельмі ўпарта працуюць спэцслужбы суседняй дзяржавы, сеючы страх, паніку, няверу ў нашыя сілы і недавер украінцам адно да аднаго. Мы паламаем гэты сцэнар і пераможам, як перамагалі да гэтага часу!» — сказаў Парашэнка, выступаючы на ўшанаваньні памяці Герояў Нябеснай сотні на майдане Незалежнасьці ў Кіеве.
«Нам супрацьстаіць магутны вораг, значна больш шматлікі, чым мы, і, на жаль, значна лепш узброены. Пляны напасьці на нас ён выношваў гадамі. Ён рыхтаваў менавіта для гэтага свае ўзброеныя сілы і фармаваў у нас унутры краіны пятую калёну. Але мы ўсё роўна мацнейшыя, таму што з намі праўда, і мы мацнейшыя, таму што з намі Бог. Для нас гэтая вайна за сваю зямлю, за нашу зямлю — вайна справядлівая, а для суперніка — не! І гэта прызнана ўсім сьветам, таму што ўвесь сьвет зараз салідарны з Украінай», — дадаў прэзыдэнт.
Паводле яго слоў, «менавіта подзьвіг Нябеснай сотні натхніў сотні тысяч украінцаў на барацьбу з расейскай агрэсіяй».
Сёньня на майдане Незалежнасьці ў Кіеве ўшанавалі памяць Герояў Нябеснай сотні. Гэты дзень, па ўказе прэзыдэнта, будуць адзначаць штогод 20 лютага.
У лютым 2014 падчас сутыкненьняў пратэстоўцаў зь сілавікамі ў цэнтры Кіева загінулі больш за сто чалавек, сотні былі параненыя, больш за ўсё — 20 лютага. Большасьць людзей загінулі ад куль снайпэраў. Пасьля загінулых удзельнікаў акцый пратэсту сталі называць Нябеснай сотняй.
