Лінкі ўнівэрсальнага доступу

Новыя дадзеныя: У выніку абстрэлу Краматорску загінулі 15 чалавек


Кіеў ускладае віну за абстрэл на сэпаратыстаў.

Ахвярамі артылерыйскага абстрэлу ўкраінскага горада Краматорск ў аўторак сталі, па папярэдніх дадзеных, 15 чалавек, больш за 60 — параненыя, у тым ліку пяцёра дзяцей.

Пра гэта паведаміў сакратар Рады нацыянальнай бяспекі і абароны Украіны Аляксандар Турчынаў.

Дэпартамэнт аховы здароўя Данецкай абласной адміністрацыі ўвечары ў аўторак паведаміў аб 12 загінулых і больш за 60 пацярпелых пры абстрэле Краматорску.

Кіеў ускладае віну за абстрэл на сэпаратыстаў. Як заявіў прэзыдэнт Украіны Пятро Парашэнка, «апалчэнцы» нанесьлі ўдар па цэнтральным штабе ваеннай апэрацыі ў Краматорску, а таксама па разьмешчаных побач жылых кварталах.

Па словах Турчынава, горад абстралялі з сучаснай расейскай сыстэмы залпавага вагню з выкарыстаньнем касэтных боепрыпасаў. Са слоў прадстаўніка Генштаба Ўладзіслава Селязьнёва вынікае, што абстрэл вёўся з Горлаўкі.

Упаўнаважаны прэзыдэнта Ўкраіны па ўрэгуляваньні сытуацыі на Данбасе Ірына Герашчанка заявіла, выступаючы ў Вярхоўнай Радзе, што перад атакай у раёне Краматорска быў зафіксаваны пралёт бесьпілётнага апарату праціўніка, перадае «Украінская праўда».

Сэпаратысты дачыненьне да абстрэлу абвяргаюць. У так званым «міністэрстве абароны» самаабвешчанай «Данецкай народнай рэспублікі», назвалі абстрэл правакацыяй украінскіх вайскоўцаў.

XS
SM
MD
LG