Ангела Мэркель заявіла, што дасягненьне дыпляматычнай дамоўленасьці будзе мець вырашальнае значэньне для падтрыманьня міру ў Эўропе. «Я не магла б жыць, не зрабіўшы гэтай спробы,» — заявіла кіраўніца нямецкага ўраду.
Мэркель і прэзыдэнт Францыі Франсуа Алянд сустрэліся з прэзыдэнтамі Ўкраіны і Расеі Пятром Парашэнкам і Ўладзімерам Пуціным на мінулым тыдні і абвясьцілі пра новую сустрэчу на найвышэйшым узроўні ў сераду ў Менску. Злучаныя Штаты ня ўдзельнічалі ў перамовах на мінулым тыдні і ня будуць удзельнічаць у перамовах у сераду.
Ангела Мэркель сказала, што незалежна ад таго, якое рашэньне адносна паставак зброі Ўкраіне прыме прэзыдэнт ЗША, «саюзныя адносіны паміж Злучанымі Штатамі і Эўропай захаваюцца і будуць заставацца моцнымі».