Барак Абама сказаў, што Расея парушыла папярэднія пагадненьні па Ўкраіне, накіраваўшы танкі і артылерыю на тэрыторыю гэтай краіны замест таго, каб вывесьці іх.
Ён заявіў: «Я пакуль не прыняў рашэньня аб пастаўках баявой зброі ва Ўкраіну, аднак папрасіў сваіх дарадцаў разгледзець такую магчымасьць у выпадку, калі дыпляматыя не спрацуе».
Прэзыдэнт ЗША паведаміў, што дамовіўся з Мэркель аб тым, што санкцыі адносна Расеі павінны дзейнічаць. Паводле яго калі Расея працягне свой цяперашні курс, яе ізаляцыя будзе паглыбляцца як палітычна, гэтак і эканамічна.
Канцлер Нямеччыны Ангела Мэркель падкрэсьліла важнасьць таго, каб Захад падтрымліваў Украіну.
«Калі мы адмовімся ад прынцыпу тэрытарыяльнай цэласнасьці дзяржаваў, то мы не зможам падтрымліваць мірны парадак у Эўропе, Расея парушыла гэты прынцып у Крыме і ў Данбасе» — сказала яна.