Лінкі ўнівэрсальнага доступу

Калектыўны заклік да празрыстых выбараў рэктара ЭГУ


Супрацоўнікі ЭГУ пікетуюць Міністэрства замежных справаў Літвы, 14 лютага 2014 года.

Супрацоўнікі ЭГУ пікетуюць Міністэрства замежных справаў Літвы, 14 лютага 2014 года.

50 грамадзкіх дзеячаў, навукоўцаў, прадстаўнікоў творчай інтэлігенцыі зьвярнуліся з адкрытым лістом у справе будучыні Эўрапейскага гуманітарнага ўнівэрсытэту.

У лісьце выказваецца «глыбокая занепакоенасьць сытуацыяй вакол выбараў новага рэктара Эўрапейскага гуманітарнага ўнівэрсытэту (ЭГУ)».

«Гэта ня проста чарговае адміністрацыйнае прызначэньне. Гаворка ідзе пра існаваньне праекту.

Нядаўняя канфэрэнцыя «Беларускі ЭГУ: пасьля 10 гадоў у Літве» зрабіла відавочным для ўсіх яе ўдзельнікаў (студэнтаў, выпускнікоў, выкладчыкаў, былых супрацоўнікаў, звольненых за іншадумства, прадстаўнікоў грамадзянскай супольнасьці і міжнародных арганізацыяў), што ўнівэрсытэт, закліканы стаць самым эўрапейскім з усіх беларускіх, наўрад ці адпавядае заяўленым ідэалам.

Галоўнымі прычынамі працяглага сыстэмнага крызісу зьяўляюцца ліквідацыя акадэмічнага самакіраваньня і стварэньне закрытай аўтарытарнай сыстэмы адміністраваньня. Ключавыя для лёсу ўнівэрсытэту рашэньні прымаюцца без удзелу выкладчыкаў, студэнтаў і іншых стэйкхолдэраў.

Працэс выбару новага рэктара — паасобная праява агульнай праблемы. Па ўсіх асноўных парамэтрах ён не адпавядае агульнапрынятым працэдурам аналягічных конкурсаў:

1. Працэс запушчаны без зацьверджанага палажэньня аб конкурсе на пазыцыю рэктара. Правілы і працэдуры выбараў да гэтага часу не вядомыя нават самім кандыдатам. Гэта дае Адборачнай камісіі шырокія магчымасьці для прыняцьця валюнтарысцкіх рашэньняў і бюракратычных імправізацыяў.

2. Кіроўная рада не ўлучыла ў склад камісіі прадстаўнікоў студэнтаў і выкладчыкаў, нягледзячы на іх неаднаразовыя законныя патрабаваньні. У камісію ня быў запрошаны ніводны зьнешні міжнародны экспэрт. Няма ў ёй і ніводнага беларуса. Гэта ператварае адкрыты міжнародны конкурс у закрытае карпаратыўнае прызначэньне пажаданага кандыдата, зацікаўленага ў захаваньні існуючай аўтарытарнай сыстэмы кіраваньня.

3. Працэс выбару рэктара ажыцьцяўляецца ў рэжыме інфармацыйнай ізаляцыі. Ні акадэмічная супольнасьць ЭГУ, ні грамадзянская супольнасьць Беларусі, ні міжнародная грамадзкасьць ня маюць інфармацыі аб выніках этапаў абмеркаваньня кандыдатаў і агульнай хады выбараў. Гэта выводзіць выбарны працэс з-пад кантролю стэйкхолдэраў і грамадзкага меркаваньня.

Такое становішча выклікае сур’ёзныя сумневы ў тым, што рашэньне Адборачнай камісіі будзе ўзважаным і справядлівым. Мы занадта добра ведаем, як робяцца выбары ў Беларусі. І ня хочам «беларускіх выбараў» у Эўропе.

Мы глыбока перакананыя, што ўнівэрсытэцкая аўтаномія зьяўляецца безумоўнай каштоўнасьцю і адным з базавых прынцыпаў эўрапейскай прасторы вышэйшай адукацыі. Але яна не адмяняе падсправаздачнасьці грамадзтву, акадэмічнай супольнасьці, донарам, палітычным партнэрам і іншым стэйкхолдэрам, якія ўзялі на сябе адказнасьць за лёс гэтага праекту», — гаворыцца ў звароце.

Падпісанты выказваюць недавер Адборачнай камісіі, легітымнасьці і справядлівасьці бягучага адбору. Яны заклікаюць «прывесьці конкурс на пасаду рэктара ЭГУ ў адпаведнасьць міжнародным стандартам, стварыць новую рэпрэзэнтатыўную Адборачную камісію і правесьці сапраўды празрысты і справядлівы конкурсны адбор».

Сярод тых, хто падпісаўся, — Святлана Алексіевіч, Уладзімір Арлоў, Алесь Бяляцкі, Лявон Вольскі, Мікола Купава, Жана Літвіна, Уладзімір Някляеў і іншыя.

Камэнтары прадстаўнікоў грамадзкасьці, якія падпісалі гэты ліст, а таксама адміністрацыі ЭГУ, — неўзабаве на нашым сайце.

Паказаць камэнтары

XS
SM
MD
LG