Лінкі ўнівэрсальнага доступу

logo-print

Гурт Вайцюшкевіча дасьць клюбны канцэрт у Менску (+падборка найлепшых песень)


Беларускі музыка Зьміцер Вайцюшкевіч

Беларускі музыка Зьміцер Вайцюшкевіч

Гурт Зьмітра Вайцюшкевіча сыграе найлепшыя песьні за 15 гадоў у межах праекту «Жывы Тузін». Эксклюзіўны канцэрт адбудзецца 6 лютага ў клюбе «Піраты».

Клюбныя канцэрты для Вайцюшкевіча — рэдкасьць. Звычайна сьпявак выступае ў сядзячых залях. 6 лютага ён запрашае сваіх прыхільнікаў у клюб «Піраты», дзе сыграе праграму з найлепшых песень. Будзе што паслухаць, і будзе пад што патанчыць. «Сапраўды, чамусьці рэдка граем у клюбах, хаця можам даць драйву напоўніцу», — кажа Зьміцер. Яго WZ-orkiestra выйдзе на сцэну поўным складам — баяніст-віртуоз Аляксандар Шувалаў, піяніст і кіраўнік джаз-ансамблю «Дыліжанс» Андрэй Лабчэўскі, выдатны гітарыст Алег Івановіч, вядучы джазавы бас-гітарыст Вячаслаў Сяргеенка, бубнач з аркестра Купалаўскага тэатру Андрэй Сапоненка разам зь Зьмітром сыграюць творы з праектаў «Народны альбом», «Я нарадзіўся тут», «Сьвяты вечар», «Цацачная крама», «Паравіны году», «Апошні золак» ды іншых — усё найлепшае з сваёй багатай творчай спадчыны за 15 гадоў. Будуць песьні на Караткевіча, Ваячака, Бураўкіна, Барадуліна, Някляева, Вольскага…

«Будзем граць каля дзьвюх гадзінаў. Пэўная частка песень, якія сыграем, ужо намечана, а частку будзем адбудоўваць па хадзе канцэрту. Спадзяюся ўсе застануцца задаволенымі», — заўважае выканаўца.

Падзея ў FB

Канцэрт адбудзецца ў клюбе «Піраты» 6 лютага ў 19:00 у межах праекту «Жывы Тузін», што ладзяць партал Tuzin.fm і грамадзкая кампанія «Будзьма беларусамі!». Квіткі каштуюць 165 000 (танцпляц), 215 000 (столік). Квіткі можна набыць он-лайн і ў касах Kvitki.by па ўсёй краіне.

Адмыслова да гэтай падзеі tuzin.fm абнавіў старонку Зьмітра Вайцюшкевіча. Цяпер там можна паслухаць і спампаваць песьні, якія выканаўца прадстаўляў у аўдыёчарце цягам апошніх 12 гадоў. Песьні таксама даступныя для праслухоўваньня на старонцы ў Soundcloud.​

XS
SM
MD
LG