Пратэстоўцы патрабавалі, каб армянскім праваахоўным органам перадалі расейскага вайскоўца Валерыя Пермякова, падазраванага ў забойстве армянскай сям’і і нанясеньні цяжкіх раненьняў шасьцімесячнаму дзіцяці.
Раней паведамлялася, што Пермякоў прызнаўся ў забойстве, але судзіць яго будуць у Расеі. Аднак 14 студзеня генэральны пракурор Армэніі Геворк Кастанян заявіў, што Пермякоў будзе прыцягнуты да крымінальнай адказнасьці на тэрыторыі Армэніі.
Забойства адбылося ў панядзелак у адным з дамоў у Гюмры (былы Ленінакан), а ў ноч на аўторак Пермякова затрымалі армянскія памежнікі непадалёк ад мяжы з Турцыяй. Трагедыя выклікала ў Армэніі шок і новыя пытаньні адносна умоў знаходжаньня расейскіх вайскоўцаў у гэтай краіне.
Пермякоў, якога пасьля затрыманьня перадалі камандаваньню 102-й расейскай вайсковай базы, што месьціцца каля Гюмры, расказаў, што ўцёк з часткі.
Паводле Пермякова, у дом сям’і Авецісян ён прабраўся, таму што яму захацелася піць. Там салдат спачатку застрэліў 51-гадовую гаспадыню дома, якая знайшла яго, а затым расстраляў сямейнікаў, якія спалі (справа адбывалася пад раніцу). Нібыта ён баяўся, што яго знойдуць, і пра яго уцёкі стане вядома камандаваньню. СМІ паведамляюць, што двухгадовая ўнучка гаспадароў была забітая штык-нажом. Выжыў толькі самы малодшы член сям’і — сямімесячны Сярожа Авецісян. Ён знаходзіцца ў рэанімацыі з нажавымі раненьнямі, стан хлопчыка ацэньваецца як цяжкі.