Лінкі ўнівэрсальнага доступу

logo-print

«Піраты» распаўсюджваюць не адрэдагаваны фільм «Левіяфан» насуперак цэнзарам Крамля


Стваральнікі тытулаванай стужкі не зьбіраюцца перасьледаваць нелегальных «кінапракатчыкаў».

Нягледзячы на высокую ацэнку міжнародных кінакрытыкаў вострасацыяльнай расейскай стужкі «Левіяфан» — у прыватнасьці, 11 студзеня фільм атрымаў адну з самых прэстыжных узнагародаў амэрыканскай кінаіндустрыі «Залаты глёбус» — улада Расеі зьбіраецца рэдагаваць фільм з прычыны парушэньня ім закона «Аб дзяржаўнай мове».

Гэта толькі распаліла, раззлавала інтэрнэт-піратаў, якія распаўсюджваюць арыгінал фільма ў сацыяльных сетках. На зьдзіўленьне, стваральнікі «Левіяфана» не зьбіраюцца перасьледаваць нелегальных «кінапракатчыкаў».

Атрымліваючы кінапрэмію «Залаты глёбус», прадусар расейскага фільма «Левіяфан» Аляксандар Раднянскі адзначыў, што стужка закранае любога ў сьвеце.

«Чым больш мы думаем пра шчасьлівы лёс нашага фільма, тым больш мы верым, што ня мае значэньня, зьяўляецеся вы карэйцам, амэрыканцам, расейцам ці французам. Трагічная гісторыя звычайнага чалавека, які сутыкнуўся тварам у твар з абыякавай сыстэмай, абсалютна унівэрсальная», — сказаў ён.

Аднак стужка, якая распавядае пра барацьбу чалавека з карупцыйнай сыстэмай, на некаторых можа зрабіць уражаньне, што гэтая гісторыя наадварот зьяўляецца даволі спэцыфічнай — для Расеі.

Аляксандар Раднянскі і Андрэй Зьвягінцаў

Аляксандар Раднянскі і Андрэй Зьвягінцаў

Гэта можа растлумачыць, чаму ў той час, як «Левіяфан» зьбірае ўзнагароды за мяжой — у тым ліку, фільм узнагароджаны ў Канах і на кінафэстывалі ў Мюнхэне — у Крамлі займаюцца рэдагаваньнем стужкі. Паводле расейскага закона, які, у прыватнасьці, забараняе выкарыстоўваць лаянку ў кіно, некаторыя дыялёгі ў «Левіяфане» зьбіраюцца выразаць.

Гэта рэдагаваньне прывяло да таго, што кожны дзень усё больш расейцаў зьвяртаюцца да пірацтва, каб паглядзець карціну ў арыгінале. Сацыяльныя сеткі Расеі захліснулі спасылкі на сайты, дзе фільм можна паглядзець у высокай якасьці. Першая вэрсія зьявілася ў інтэрнэце 10 студзеня, за дзень да таго, як «Левіяфан» выйграў «Залаты глёбус».

«Левіяфану» прадказваюць «Оскар»

Звычайна, кінэматаграфісты асуджаюць незаконную загрузку ці прагляд фільмаў, пазбаўляюць іх даходаў і кантролю над уласнай працай. Аднак, прадусар «Левіяфана» Аляксандар Раднянскі сказаў, што ні ён, ні рэжысэр стужкі Андрэй Зьвягінцаў ня маюць намеру перасьледаваць піратаў, якія распаўсюджваюць іх фільм, вылучаны ад Расеі на прэстыжную прэмію «Оскар».

«Усе фільмы, прадстаўленыя на „Оскар“, былі загружаныя па-пірацку. Мы імкнемся пірацкія сайты зачыніць, але нас радуе, калі спрачаюцца пра фільм», — сказаў Раднянскі ў інтэрвію" Рускай службы навінаў«.

Па словах Марка Олсэна, кінакрытыка амэрыканскай газэты LA Times, «Левіяфан» мае высокія шанцы атрымаць «Оскар». Крытык лічыць, што вытанчаны стыль стужкі можа спадабацца сябрамам Амэрыканскай кінаакадэміі, якія абіраюць пераможцаў, бо яны часта аддаюць перавагу замежным фільмам з палітычным падтэкстам.

«Шмат што ў „Левіяфане“, на маю думку, можа разглядацца выключна як палітычная і прамая крытыка сучаснага палітычнага клімату ў Расеі, але калі стваральнікі фільма гавораць пра яго, яны любяць прадстаўляць яго агульным. Катэгорыя замежных фільмаў вітае сувязь гэтых стужак са сьветам, але не прамую палітычнасьць», — сказаў Олсэн ў інтэрвію Радыё Свабода.

Пяць фільмаў-фіналістаў, якія будуць змагацца за «Оскар» у катэгорыі «Лепшы фільм на замежнай мове», абвесьцяць у Лос-Анжэлесе ў чацьвер, 15 студзеня.

Матэрыял падрыхтавалі Дэйзі Сіндэлар і Ганна Шаманская для сайту украінскай службы Свабоды.

XS
SM
MD
LG