Лінкі ўнівэрсальнага доступу

8 мільёнаў эўра ад ЭЗ на разьвіцьцё грамадзянскай супольнасьці ў Беларусі


Майра Мора

Майра Мора

Эўразьвяз выдзеліць 8 млн. эўра на праекты ў рамках праграмы «Арганізацыі грамадзянскай супольнасьці і мясцовыя органы ўлады» ў Беларусі да 2017 году. Пра гэта паведаміла кіраўніца прадстаўніцтва ЭЗ у Менску Майра Мора на прэсавай канфэрэнцыі 14 студзеня.

Паводле яе, прыярытэтамі Эўразьвязу ў рамках гэтай праграмы будзе ўцягваньне грамадзянскай супольнасьці «ў дзейнасьць па разьвіцьці і кіраваньні як на нацыянальным, так і мясцовым узроўнях» і разьвіцьцё мясцовага самакіраваньня.

Пасол ЭЗ адзначыла, што ў 2015 годзе праграма будзе засяроджаная на пытаньнях абароны навакольнага асяродзьдзя і энэргетыкі, а ў 2016 годзе — на рэгіянальным разьвіцьці.

Як адзначыла Майра Мора, у мінулыя гады найбольшую актыўнасьць праяўлялі прадстаўнікі Гомельскай вобласьці.

Усе заяўкі на праекты будуць разгледжаны конкурснай камісіяй, якая складаецца з супрацоўнікаў прадстаўніцтва ЭЗ і эўрапейскіх экспэртаў.

Фундаваная Эўразьвязам праграма «Арганізацыі грамадзянскай супольнасьці і мясцовыя органы ўлады» дзейнічае з 2014 па 2020 ў 66 краінах. Яе агульны бюджэт складае 1,9 млрд. эўра.

Краіны ЭЗ і Зьвяз у цэлым сталі больш падтрымліваць грамадзянскую супольнасьць Беларусі пасьля падзеяў 19 сьнежня 2010 году. «Калі з 2006 па 2011 гады 54% усяго аб’ёму донарскай дапамогі ад краін-сябраў і інстытутаў ЭЗ для Беларусі было разьмеркавана празь дзяржаўныя інстытуты і толькі 13% — праз грамадзянскую супольнасьць, то ў 2012 годзе — адпаведна 40 і 22%», — адзначаецца ў дасьледаваньні замежнай дапамогі Беларусі.

Паказаць камэнтары

XS
SM
MD
LG