Канцлер ФРГ Ангела Мэркель і большасьць міністраў яе кабінэту возьмуць удзел у мітынгу «за адкрытую і талерантную Нямеччыну», скліканым на ініцыятыву лідэраў мусульманскіх абшчын пасьля сэрыі тэрарыстычных актаў у Францыі. Мітынг, які пройдзе ля Брадэнбургскай брамы ў цэнтры Бэрліну ў аўторак, наведаюць, як чакаецца, лідэры апазыцыйных партый і прэзыдэнт Нямеччыны Ёахім Гаўк.
Мэркель падзякавала лідэрам чатырохмільённай мусульманскай абшчыны Нямеччыны за тое, што яны без прамаруджаньня асудзілі акты гвалту ў Францыі. Яна заявіла, што іслам зьяўляецца «часткай Нямеччыны», а сябе назвала лідэрам усіх немцаў.
Раней вядучыя нямецкія палітыкі заклікалі актывістаў антыісламскага руху ПЭГІДА («Занепакоеныя эўрапейцы супраць ісламізацыі Захаду») адмовіцца ад заплянаванага на панядзелак маршу ў Дрэздэне, дзе падобная акцыя раней сабрала 18 тысяч чалавек.
На адрас руху раздаюцца абвінавачваньні ў тым, што ён эксплёатуе ў сваіх мэтах забойствы, учыненыя джыхадзістамі ў Францыі.
Акцыі ў падтрымку руху і супраць яго заплянаваны ў многіх гарадах Нямеччыны, уключаючы Гановэр, Дзюсэльдорф і іншыя, паведамляе тэлекампанія ARD. У Лейпцыгу акцыя будзе насіць назву ЛЕГІДА. Тут таксама заплянаваны выступл іх праціўнікаў.
Свая ПЭГІДА, як перадае Франс прэс, створана ў Швэйцарыі.