Лінкі ўнівэрсальнага доступу

Міт Ромні гатовы вылучацца на прэзыдэнта ад рэспубліканцаў


Міт Ромні

Міт Ромні

Былы кандыдат на прэзыдэнта ад Рэспубліканскай партыі Міт Ромні разглядае магчымасьць паўторнага вылучэньня сваёй кандыдатуры на найвышэйшую пасаду ў дзяржаве на выбарах 2016 году. Пра гэта ён упершыню паведаміў у пятніцу ў Нью-Ёрку ў час сустрэчы з патэнцыйнымі фінансавымі донарамі.

«Мяне пытаюць, ці сапраўды я хачу быць прэзыдэнтам? Так, я сапраўды гэтага хачу і ўжо двойчы гэта даказваў», — сказаў Ромні. У 2008 годзе Ромні саступіў у барацьбе за намінацыю ад рэспубліканцаў Джону Макейну, чатыры гады счакаўшы, ён дамогся вылучэньня, але прагуляў зь вялікім адрывам Бараку Абаму.

Яшчэ некалькі месяцаў таму Ромні ў інтэрвію тэлеканалу NBC запэўніваў, што ня будзе зноў змагацца за намінацыю сваёй партыі

Пасьля мерапрыемства адзін з найбліжэйшых памочнікаў Ромні заявіў: «Міт настроены занадта патрыятычна, каб заставацца пабочным назіральнікам і аддаць прэзыдэнцтва дэмакратам Хілары Клінтан ці сэнатару Элізабэт Уорэн. Ён шмат езьдзіў па краіне ў мінулым годзе, сустракаўся з грамадзянамі і, мяркую, прыйшоў да высновы, што здольны сёньня адыграць канструктыўную ролю ў жыцьці сваёй краіны».

Яшчэ некалькі месяцаў таму Ромні ў інтэрвію тэлеканалу NBC запэўніваў, што ня будзе зноў змагацца за намінацыю сваёй партыі, якая валодае сёньня «цэлым шэрагам годных кандыдатаў, здольных лепш, чым я сам, данесьці праграму рэспубліканцаў да выбарнікаў».

На днях аднапартыец Ромні, былы губэрнатар Флёрыды Джэб Буш абвясьціў аб стварэньні арганізацыі па зборы сродкаў на выпадак магчымага ўдзелу ў прэзыдэнцкай кампаніі 2016 году. І Буш, і Ромні зьяўляюцца фаварытамі найбуйнейшых фінансавых донараў рэспубліканцаў, і нечаканая заява Ромні, як адзначаюць камэнтатары, уносіць некаторую сумятню ў перадвыбарныя пляны партыйнага істэблішмэнту.

Паказаць камэнтары

XS
SM
MD
LG